Dhibaatada waa loo adkaystaa markay muuqato dadaal loogu jiro xallinteeda. Soomaaliduse waxay u eg tahay inay ku heshiisay yaan qof inaga harin".

Jahawareerka iyo hoogga iyo ba,a waxaa ka sii daran sida aayuhu u fool xun yihiin. Qofka wanaaggiisa waa loo qiraaye, Raiisul wasaare Nuur Cadde wuxuu muujiyey odaynimo iyo nabad raadin. Wuxuu isku dayey intii awooddiis ah, sida noo muuqata, inuu Soomaalida isu keeno oo wada hadal siiyo. Wuxuu ogaaday inaan Soomaaliya xal kale lahayn in Soomaalidu heshiiso mooyee.

Wuxuu ogaaday in ciidammo shisheeye intay doonaan ha tiro le,ekaadeene aanay demin karin dabka shidan.

Wuxuuse Nuur Cadde noqday nin dhagax la hadlaya. Dowladda uu Raiisul wasaaraha u yahay oo ay ku badan yihiin dagaal-oogeyaal u miciyo lisanaya in dowladdu burburto oo ay hawshoodii laga dhabqiyey meesheedii ka sii wataan, wuxuu kala kulmay eedayn joogta ah oo lagu mija xaabinayo dadaalka uu wado.

Xagga kale kuwa Mucaaradka ee Casmara iyo gudahaba waxay intooda badani toos ugu sheegeen inaysan heshiis rabin. Marmarsiinyahoodu waa waddaninimo iyo diin jaceyl.

Labadaasi waxay noqdeen geed dhiigyocab kastaa ku gabbado si uu u gaaro dantiisa gurracan. Nuur Cadde ma quusan, wuxuuna helay nin Muuritaaniya u dhashay una shaqeeya Qarammada midoobay oo arrinta Soomaalida si walaalnimo u doonaya in la xalliyo.

Axmed Wild Cabdalla wuxuu isku xiray isbahaysiga Casmara iyo Nuur Cadde isagoon ka daalin inuu toban jeer isaga daba ka laabto si uu isugu soo dhaweeyo Soomaalidaas qarriban. Sidaan qabo, nin kale waa ka daali lahaa, laakiin Wild Cabdalla waa lafo diriray. Dadaalkii Wild Cabdalla iyo Nuur Cadde waxaa ka dhashay heshiiskii Jabuuti.

KALA QAYBSANKA ISBAHAYSIGA

Isbahaysiga Casmara way ku qaybsameen heshiis raadinta, kala qaybsankaasina wuxuu salka ku hayaa siday markoodii hore u kala duwanaayeen. Dhammaantod waxay ku midaysnaayeen ka soo horjeedka dowladda ku meelgaarka ah, laakiin wax kasta oo kale way ku kala duwanaayeen.Qaarkood waa niman aaminsan Soomaalidu inay gaalo yihiin oo hadda la baro diinta, si taas loo helana waa inay iyagu talada dalka xoog kula wareegaan.

Qof kasta oo taas hadal ka keena dhiiggiisu waa bannaan yahay.

Itoobiya waa ku gabanayaane, wadahadal marna ma oggola xataa hadday Itoobiya baxdo.

Qaarkood waxay ka socdaan ganacsatada ku naaxday dowlad la,aanta, marna aan oggolaaneyn in dalka dowladi ka dhalato noocay doonto ha ahaatee. Qaarna waa dad dano qabiil wata, kuna hoos gabbanaya diin iyo dal jaceyl. In yar oo isbahaysiga ka mid ah ayaa la oran karaa waa dad Soomaalinnimada iyo muslimnimadu ka dhab tahay, sidaan qabana waa kuwa maanta go,aansaday inay ka qayb galaan wadahadalka oo uu hoggaaminayo Sheekh Shariif Sheekh Axmed.

Itoobiya sidii ay rabtay ayaa wax u socdaan, Zenawina ma kala jecla haddii askartiisa oo dhan la laayo. Awalba wuu soo qafaalay, kharashkana Maraykan baa bixinaya. Waa inaan ogaannaa in Itoobiya ay weligeed na xukumayso inta ay Soomaalidu qaybsan tahay xataa haddii ciidammadeedu dalka ka baxaan. Maanta Itoobiya iyada ayaa xukunta Somaliland iyo Puntland, ninkasta oo madax ka ah gobolladaasna markay rabto ayey xirtaa. Sidaa awgeed, haddii itoobiyaaku maanta ciidammadiisa ka saaro dalka weli Soomaaliya Addis abba ayaa laga xukumayaa haddaynaan heshiin.

Dadka marmarsiinyaha ka dhiganaya Itoobiyaan dalka ka saaraynaa taas waa ogyihiin, laakiin dan kale ayey leeyihiin. Haddii Soomaalidu heshiiso Itoobiya maalin dalka ma joogi karto. Weligaa ka maqli meysid dadkaas dagaallamaya waxa ay sameyn doonaan haddii dalka itoobiya laga saaro Waxay oranayaan " taas hadda looma joogo" Waa runtood oo iyagu waxay aaminsan yihiin in marka Soomaalidu isu soo harto in iyagu gacanta sare leeyihiin.

Waxay u dagaallamayaan intooda badani in ay boobaan hantida, daadiyaan dhiigga, degaan dhulkii iyo guryihii ay ka boobeen dadka. Waxay rabaan inay isbaaro dhigtaan jid kasta, kufsadaan gabar kasta, dhoofiyan soona dejiyaan waxay rabaan xataa dadka nool. Qofka qorshahaas wataa wax kasta oo nidaam iyo dowlad la yiraahdo ma oggola.Kaba soo qaad in Itoobiya maanta ciidammadeeda gurato.

Maxaa xiga? Waxaa xiga in Soomaalidu meesheedii ka sii waddo dagaalka sokeeye, qof kasta oo muuqda la dilo, maatadu baaba,do,jid kasta isbaaro la dhigo, dalkuna noqdo meel dadka lagu qasho. Intaas oo ay siidheertahay in Itoobiya weli na xukunto. War Ilaah baan idinku dhaarshaye waxaasi xornimaa Soomalidu waa inay ogaataa qodobbadan aan kusoo koobay maqaalkan;

1) Ka xoroobi maynno Itoobiya inta aan innagu is-haysanno xataa haday ciidammadeeda la baxdo

2) Itoobiya naga adag intaan qaybsannahay

3) Ma jiro urur, qabiil ama koox inta kale xoog ku muquunin karta

4) Ka bixi maynno hooggan jeeraan yeelanno dowlad

5) Si dowlad loo dhiso waa in dabac iyo tanaasul la sameeyaa

6) Qof kasta oo Soomaali ah xaq buu u leeyahay inuu ka qaybqaato talada dalka Sidaa awgeed waa inaynnu adeegsannaa caqliga Ilaah ina siiyey illeyn xoolo ma nihine.

Diinta iIslaamkana yaan la wasakheyn oo lagu bannaysan dhiigga dadka waana in la ogaadaa dad baa la siraaye Ilaah lama siro Wuxuu ogyahay waxa qarsoon iyo waxa muuqda.Dagaal in noogu filan waa aragnaye bal aan eegno waxa dhaca haddii la wada hadlo. Waa bilow wanaagsane aynu taageerno heshiiskii Jabuuti. Waxaa laga yaabaa in Ilaah inaga siiyo dowlad dabka demisa, dalkana u diyaarisa nabad, heshiis, walaanimo iyo dowlad lagu negaado.

WA BILLAAHI TAWFIIQ.

Cabdiraxmaan Cilmi Xaashi

Kala xiriir:

Abdirahman.Elmi.Hashi@sshf.no

Geeridii Marxuum C/qaadir Yaxye, weli xusuus ayay nagu tahay dhamaanteen ama inta wanaagsan

Seddex sano ka hor xalay oo kale ayay ahayd markii ay kooxo hubeysan gurigiisa ku dileen marxuum C/qaadir Yaxye Shiikh Cali oo ka mid ahaa Mas’uuliyiinta sare ee Hay’adda Cilmi baarista iyo wadatashiga CRD.

Marxuum C/qaadir Yaxye waxaa uu ka tegay xusuus aysan hilmaamin Dadka Soomaaliyeed, taasi oo ah kaalintii uu ku lahaa u ololeynta nabadda, dib u heshiisiinta, horumarinta dhaqaalaha Soomaaliya, wuxuuna si weyn uga shaqeyn jiray sidii loo soo celin lahaa Nabaddii iyo kala dambeyntii Soomaaliya.

Hadallo uu ka jeediyay Shirar badan oo uu ka qeybgalay ayuu ka sheegay hadallo weli taagan oo ku aadan Dhibatada Soomaaliya ka jirta haddii ay ahaan lahayd dilalka, xaalufinta lagu hayo kheyraadka dalka iyo weliba sida uu dalka Soomaaliya dhul, cir iyo bad uu u noqday mid laga isaga tallaabiyo waxyaabo sharci darro ah.

Dalalka Kenya iyo Ethiopia ayuu sheegay in ay lacag aad u badan Qaad uga bedeshaan Dadka Soomaaliyeed, sidoo kalena ay Dowladda Itoobiya lacag aad u badan ugu bedesho dadka Soomaaliyeed hub, wuxuuna intaas ku daray in uu dalka Soomaaliya noqday meel la isaga gudbiyo waxyaabo sharci darro ah oo ay daroogada ka mid tahay.

Runtii C/qaadir Yaxye waxaa uu ahaa Nin wax badan ku baraarujin jiray Dadka Soomaaliyeed inay aayahooda ka tashadaan, isla markaana ay ogaadaan wixii dhibaato ugu jirto iyo wixii u faa’iido ah, wanaaggaas uu Umadda u sheegayay dartiis ayaana loo dilay, sida ay sheegeen Dad badan oo ka qeybgalay aaskiisii oo dhacay 11-kii July 2005.

“Magaalada hadda aan joogno ee Muqdisho dadka ayaa la dilayaa, Soomaalida dhaqan iyo caado uma lahayn in ninka wax dila uu dadka iska dhexmaro qof la hadlana aysan jirin, dadkiina dad nool oo sharaf, diin, dhaqan iyo caado leh waaye, waxba kama duwana marka dhurwaa intuu Ri’ iska qabsado iska dilo oo halkaas iska maro, Dadka waa ka sheekeynayaan dhibaatadaas waxba kama qabanayaan, dadkaas annaga ayaa ka mid ah, idinka ayaa ka mid ah, kuwa naga maqan ayaa ka mid ah, Dad badan oo Diinta iiga fiican ayaa idinku jira, Soomaaliya xaaladdeeda waxay taagan tahay Aleysa Minkun Rajulun Rashiidun, mala waayay hal nin oo fiican oo idinka mid ah”

ayuu ka yiri C/qaadir Yaxye Dood wadaag looga hadlayay Xal-u-helidda Mushkiladda Soomaaliya, taasi oo ay soo qaban-qaabisay Hay’adda CRD.Waxaa xusid mudan in ay sii socdaan waxyaabihii uu marxuum C/qaadir Yaxye ka digi jiray ee ay ugu horeeyeen dilalka dadka aan waxba galabsan loo geysanayo, kuwaasi oo kuwii ugu dambeeyay loo geystay Afhayeenkii Ganacsatada Gobolka Banaadir Cabaas Maxamed Ducaale,

Guddoomiyihii Guddiga Taakuleynta Agoonta C/kariin Shiikh Ibraahim Dhiblaawe oo isaguna ganacsade ahaa iyo Cusmaan Cali Axmed oo ahaa MAdaxii Xafiiska Muqdisho ee Hay'adda UNDP, kumaan kale oo Somali nah 17 sano si ugaarsi ah loogu diley. iyo kuwa ka baxsadey oo dhaawacyo la gaarsiiyay.

Wuxuu ka hadlay C/qaadir Yaxye waxyaabo haddii ay sameyso ay ku guuleysan karto Dowladda Federaalka Soomaaliya oo xiligaas xubnaheeda ay Muqdisho iyo Jowhar kala deganaayeen, wuxuuna sheegay in ay Dowladda guuleysan karto haddii ay la timaado cod dib u heshiisiineed, wuxuuna sheegay in haddii ay cod dib u heshiisiineed oo ka qaldamay Dowladdii Carta ay la timaado ay guuleysan karto, haddii ay la imaan weysana ay guul-darreysaneyso.

sidaas waxaa intii uu noolaa yiri C/qaadir Yaxye oo intaas ku daray in Soomaaliya ay u eedeysan tahay Shacabkeeda, Shacabkeedana ay u eedeysan yihiin amuur aysan iyagu ka arimin.

Marxuum C/qaadir Yaxye Shiikh Cali isagoo dhibaatada Soomaaliya ka fogaan karay ayuu go’aansaday in uu dhibataada la qeybsado dadka Soomaaliyeed, isagoo uu dhibkii la qeybsanaya ayaana la dilay.

Magaalooyin badan oo ka tirsan Caalamka ayaa maanta waxaa lagu qabanayaa xusas loogu baroor-diiqayo marxuum C/qaadir Yaxye Shiikh Cali oo u ololeyn jiray Nabadda iyo Xuquuqda Aadanaha.

Ugu dambeyntii, Marxuum C/qaadir Yaxye waxaa uu ku dhashay Magaalada Muqdisho sanadkii 1957, wuxuuna wax ku bartay isla Muqdisho, wuxuu ka soo shaqeeyay Wasaaraddii Beeraha xiligii Dowladdii hore, Safaaraddii Mareykanka ee Soomaaliya ayuu ka soo shaqeeyay, sidoo kale wuxuu ka soo shaqeeyay howlgalkii rajo soo celinta ahaa ee UNOSOM II ay Soomaaliya ka waday, wuxuu la soo shaqeeyay Midowga Yurub, wuxuu xubin ka ahaa Bahda Isboortiga Soomaaliyeed, wuxuu la soo shaqeeyay Hay’adda Daryeel Bulsho Guud (DBG), markii ugu dambeysayna wuxuu ka tirsanaa madaxda Hay’adda Cilmi Baarista iyo Wada-tashiga CRD>

Banaadir Post.

Sheekh Yuusuf Indhacade oo ku adkeysanaya inaysan xabada joojin doonin.

Sheekh Yuusuf Maxamed Siyaad "Indhacade" oo ah xoghayaha arrimaha gaashaandhiga Isbaheysiga dib u xoreynta Soomaaliya oo sheegay inuu ku sugan yahay gudaha Muqdisho ayaa ka hadlay dagaalada ka huraya Koonfurta Soomaaliya gaar ahaan Muqdisho.
Sheekh Yuusuf Indhacade.

Indhacade oo Saxaafada Muqdisho qaarkood lasoo xiriiray ayaa sheegay inaysan waligood xabada joojin doonin ilaa dalka dharaar cad ay isaga baxaan ciidamada Ethiopian-ka ee xiligaan ku sugan.

"Qoriga kor ayaan u heyneynaa isagoo amaanka u furan leebkana aan farta ku heyno hoosna uma jeedin doono ilaa ciidamada cadawga ah ee Ethiopian-ka isaga baxaan dhulkeena, ciidaan iyaga ma lahan Soomaali ayaa leh waana inay faarujiyaan" ayuu yiri Sheekh Yuusuf Indhacade.

"Dagaalka Marna ma joojin doono, waana wadaynaa ilaa cadowga dalkeen ka saarno, waxaana ugu baaqaynaa Mujaahidiinta inay dardargeliyaan dagaalada ay kula jiraa Gumaysiga dhulkooda heysta" ayuu yiri Sheekh Yuusuf Indhacade.

"Kuwa jabbuuti heshiiska ku galay ha tuubakeeneen ilaahna cafis ha weydiisteen,,

Sidoo kale, Indhacade ayaa eedeyn kulul u jeediyay xubnaha uu hogaaminayo Sheekh Shariif ee ka qeyb gashay shirkii Jabuuti, waxuuna ku tilmaamay inay yihiin calooshood u shaqeystayaal jeebka loo buuxiyay.

Xoghayaha Arrimaha Gaashaan dhiga ee Isbahaysiga Dib u xoraynta Sheekh Yuusuf Maxamed Siyaad (Indha cadde) waxa kale oo uu sheegay inay beentahay sheegashada Ciidamada Itoobiyanka ah ee ah in saraakiil iyo Ciidamo fara badan ay ka dileen dhankooda, "Waa been taas waxey doonayaan inay ku qariyaan saraakiisha iyoo ciidamada Itoobiyaanka ah ee aan ka dilnay ee gaaraya 176, waxaana dhaawac gaarsiinay in ka badan 500-oo ciidamada Itoobiyaanka ah" ayuu yiri Yuusuf Indhacadde.
Si kastaba ha ahaatee, xubnaha Isbaheysiga magacooda wata ayaa fikirka ku kala duwanaaday iyadoo muddooyinkii ugu dambeeyay erayo ay isku cambaareynayaan isku marsiinayeen Warbaahinta kala duwan.

Yuusud Indhacade oo inta badan codkiisa laga maqli jirey BBC-da ayaa maalmahan laga maqlaa Idaacada Lokalka Moqdisho, ka dib markii BBC-da su,aalo adag laga weydiiyay markii ugu danbeysey.

Sheekh Yuusuf ayaa markasta sheegta inow joogo Magaalada Moqdisho, taaso dadka qaarkii aaminsanyihiin ineysan run ahayn.

Banaadir Post.,

Xamar Cade.

Maamulka Gobolka Banaadir oo Ciidanka Dowladda Hoose Ee Xamar iyo Saraakiishooda u jeediyay inay Howshooda dar dar geliyaan

Waxaa manta Shir iskugu yimid Maamulka Gobolka Banaadir iyo Saraakiisha Ciidanka Ilaalinta Deegaanka Xamar, kaasi oo looga hadlayay arimo badan oo la xiiriira hawlaha kala duwan ee Ciidankaasi ayaa maanta lagu qabtay xarunta ciidankaasi ee magaaladda Muqdisho.

Shirkaas oo ay ka qeyb galeen qaar ka mid ah Masuuliyiinta Gobolka Banaadir , Gaar ahaan ku xigeenka arimaha bulshadda Maxamed Cusmaan Cali (Dhagaxtuur) iyo Taliyaha Ciidanka Ilaalinta deeagaanka Xamar G/Sare Cali Cosobow , waxaa loogaga hadlay Arrimo dharwr ah , oo ay ugu horeyso sidii ciidankaasi ay u laba laabi lahaayeen Hawlaha ay u hayaan Bulshadda Soomaaliyeed, gaar ahaan sida Uruurinta Cashuuraha kala duwan, Caafimaadka, Aadaabta suuban iyo ilaalinta dhaqanka iyo dhismaha qeybaha Ciidanka.

Taliyaha Ciidanka Ilaalinta Deeganka Xamar G/Sare Cali Cosobow oo ugu horeyntii ka hadalay halkaasi ayaa sharaxaad ka bixiyay wax qabadka Ciidanka Xiligaan iyo hawlaha Horyaala, waxaana uu sheegay in Ciidanku uu haatan ku hawlan yahay sidii uu u gudan lahaa hawlaha uu u xilsaaran yahay oo ah kuwo adeeg bulsho ah iyo uruurinta dakhliyadda kala duwan ee Dawladda Hoose ee Xamar, isagoo sheegay in uu si toos ah uga hawl galo suuqyadda kala duwan ee magaladda si buu yiri ay u soo uruuriyaan cashuuraha ku waajibay dadweeynaha kuwaas oo uu carabaabay in wax loogaga qabanaayo Naadaafadda bilicdda caasimadda iyo Nolosha ciidanka Ilaalinta deegaanka Xamar. Ku-Xegeenka duqa magaaladda Muqdisho ee dhinaca arimaha Bulshadda Maxamed Cusmaan Cali (Dhagax Tuur) oo isna ka hadlay shirkaasi ayaa ku nuux nuuxsaday waajibaadka balaaran ee saran ciidanka ilaalinta deegaanka iyo sida ay laga mamaanka ay u tahay in ay u gutaan waajibaadakaasi sidii loogu talagalay.

Md. Dhagaxtuur waxaa uu sheegay in inkastoo Ciidanku ay soo gaareen Dhibaatooyin badan ayna weli jiraan balse loo baahan yahay in ay u dhabar adeegaan, waxaana uu xusay in good ahaan arimahaasi oo dhan laga gudbi doono.

Maxamed Cusmaan Dhagaxtuur waxaa kale oo uu intaasi ku daray in ciidanka Ilaalinta Deegaanka loo abuuray in ay dhawladda Hoose ee xamar ay ka caawiyaan xagga arimaha Bulshadda iyo dhowridda iyo ilaalinta anshaxa suuban ee bulshadda sidaas darteedna ay waajib tahay in ay yeeshaan iskaashi min sarkaal iyo kan ugu hooseya si looga gun gaaro ujeedooyinka laga lahaa abuurista ciidankaasi.

Dhinaca kale Ku xegeenka Dhinaca Arimaha Bulshadda ee Gobolka Banaadir waxaa kale uu maanta kormeer uu ugu kuurgalayay Habsami u socodkaas hawlaha Waaxdda Beeraha iyo Xanaanadda Xoolaha ee dawladda hoose uu ku soo kala bixiyay dhawr Goobood oo ay dawladda hoose horay u dhireysay iyo dhismooyinka qaar ka mid ah jirdiinooyinka sida Tan FIAT oo ah halka uu ka bilowddo KMT-ka O ee Magaaladda Mugdiosho iyo kuwo kale oo loogu tala galay in ay ku nastaan dadweeynaha xiliyadda aaney ku jirin shaqadda.

kuwaasi oo muhiimad gaar ah u leh bilicdda iyo qoruxdda

Caasimadda dalka ee Muqdisho.

Banaadir Post.

Moqdisho.

Xerooyin lagu tababaro kooxaha ka soo horjeeda Dowladda oo laga furay Kismaayo iyo Bu’aale oo lala wareegay

Xerooyin lagu tababaro kooxaha ka soo horjeeda Dowladda KMG ee dagaalada ku soo qaada fariisamada ciidamada Dowladda ayaa lagu soo waramayaa in laga furay duleedka magaalada Kismaayo ee gobolka Jubada Hoose.

Xerooyinkan ayaa la sheegay in tababar lagu siiyo maliishiyooyinka ka tirsan kooxaha mucaaradka ee ka soo horjeeda Dowladda, waxaana xerooyinkaasi casharo Milateri ka bixiya rag ka tirsan Maxkamaddaha Islaamiga ee laga eryay caasimada dalka Soomaaliya ee Muqdisho.

Dhinaca kale ciidamo ka tirsan Maxkamaddaha ayaa si nabadgelyo ula wareegay gacan ku heynta degmada Bu’aale ee gobolka Jubbada Dhexe, halkaasi oo aanan jirin iska hor imaad ka dhacay.

Sheekh Salaad Somoow oo ka tirsan hoggaamiyeyaasha Maxkamadaha Islaamiga ee gobolka JDhexe oo meel fagaare ah kula hadlayey dadweynaha degmadaasi ayaa sheegay in ay maamul Islaami ah ka dhisayaan degmada Bu’aale isla markaana aysan ogoleyn in maamulka Dowladda KMG u soo magacowday degmadaasi ka shaqeeyo Bu’aale kana soo horjeedaan.

Gobolka J/Hoose iyo J/Dhexe ayaa inta badan gacanta ay ugu jirtaa Maxkamaddaha Islaamiga iyo Al-Shabaab, waxaana degmooyinka maamulada Islaamiga laga hirgeliyay ka mid ah Degmada Saakow, Salagle iyo deegaano kale...

Banaadir Post

Xamar Cade.

Maamulka gobalka Banaadir oo eedeyn kulul ujeediyey Ururka Al-Shabaab.

Maamulka gobalka Banaadir ayaa siweyn cambaareyn waxa ay ugu jeediyeen Ururka Al-Shabaab oo sheegta inta badan Masuuliyada weerarada lugu qaado dawladda Soomaaliya & Ciidamada caawinaya ee Itoobiya.

Gudoomiyaha gobalka Banaadir Maxamed Cumar Xabeeb oo ka hadlayey Magaalada Muqdisho ayaa sheegay dilkii loo geystay Allaha unaxariistee Cusmaan Cali Axmed ,madaxii UNDP ee dalka Soomaaliya in ay Masuuliyadiisa lahaayeen Kooxaha ka soo horjeeda dawladda Faderaalka ee Soomaaliya ,gaar ahaan Ururka Al-Shabaab oo uu ku sheegay mid aan dooneyn Nabadgalyada Soomaaliya.

Mudane Maxamed Dheerre wuxuu sheegay in looga baahan yahay Dadka Soomaaliyeed in ay la dagaalamaan cid walboo ka soo horjeeda Horumarkooda ,wuxuuna dadku usheegay in ay qeyb kaga biiraan dagaalada lugula jiro Ururka Al-Shabaab.

" Waxa ay dilayaan cid walboo dan uheysa Shacabka Soomaaliyeed ,waxa ay doonayaan in aysan Soomaaliya nabad ka dhicin ,waxa ayna doonayaan Dhibaatada Shacabka Soomaaliyeed lugu hayo oo ii socota ,waxa ayna dileen Madaxii UNDP ee dalka Soomaaliya ayagoo ka careysan ka shaqeynta Nabadda Soomaaliya" Ayuu yiri Gudoomiyaha gobalka Banaadir.

Duqa Muqdisho wuxuu sheegay in uu Maamulkiisu dagaal adag kula jiro Ururkaasi ,wuxuuna wacad ku marey in ay ka saarayaan dalka Soomaaliya ,isagoo ugu baaqay beesha Caalamka in gacan lugu siiyo dawladda Soomaaliya la dagaalanka Ururkaasi.

Gudoomiyaha gobalka Banaadir Ahna Duqa Magaalada Muqdisho Mr. Maxamed Cumar Xabeeb wuxuu hadalkiisan ku soo aaday xili Ururka Al-Shabaab ay ku eedeeyeen dawladda Soomaaliya in ay ka dambeeyeen dilkii Cusmaan Cali Axmed.

Maxamed dheerre eedeynta ujeediyey Al-Shabaab ,waxaa kaga horeeyey Dawlado ay ka mid tahay Xukuumada Mareykanka oo ku eedeeyey in ay dilkaasi ka dambeeyaan ,waxa ayna Washignton ku baaqday talaabo deg deg ah oo laqaado.

Banaadir Post.

Xamar Cade.