Haweeney Guddoomiye ku-xigeen ka aheyd degmada X/jajab oo goor dhoweyd lagu toogtay agagaarka shineemo Afrika oo ku taala isla degmadaasi

Guddoomiye ku-xigeenkii degmada X/jajab ee magaalada Muqdisho oo aheyd haweeney lagu magacaabo Cambaro Cali ayaa goor dhoweyd abaarihii 10:00 barqanimo ee maanta lagu toogtay agagaarka Shineemo Afrika oo ku taala isla degmada X/jajab ee magaalada Muqdisho.

Dilka haweeneydan ayaa la sheegay inuu geystay nin ku hubeysnaa bastoolad xilli ay ka soo baxeysay gurigeeda oo ku yaala shineemada loo yaqaano Afrika ee ku taala nawaaxiga Suuqii hore ee Ceelgaabta oo ku yaala isla degmada X/jajab, waxaana haweeneydan oo dhowr xabadood ay ka haleeleen dhinaca caloosha loola cararay isbitaalada magaalada Muqdisho, iyadoo xaaladeedu ay aheyd mid si aad ah u liidata oo laga cabsi qabo iney u geeriyooto dhaawacyada halista ah ee soo gaaray.

Alshabaab kuwa sheegta inay Diini yihiin, laakin ah dad dhaqan, dhaqankaas lagu yaqaan Alshabaab ma ahan mid ay qabaan ISLAAM IGO GAALO.

Gabadhan wax danbi ah ma galin oo aan ahayn iney ahayd qof dumar ah oo ku shaqeysa DF.

Qofka Soomaliga ahi Xaq ma u leeyahay inow shaqo tago, mise waa gaalnimo?

Bal waxa xiga aan dhowrno.

Banaadir Post

BBC-da Yuusuf Garaad ninkii doonayoo daynay hadalkeede

BBC ninkii doonayow daynay hadalkeede,

Beri hore haday door ahayd maanta waa dacase,

Dagaal-ooge goortuu qabsaday doocba garanaynin,

Dacbey noqotay oo haatan waa laga dareeraye;
Musiibada dalkii ku habsatoo dabana dheeraatay
Waa meel dabkeed laga hurshaa dirir qabyaalaade
Dadqalladiyo mooryanta xamar loo durbaan tumu;,
Waa meel halqoys uu degoo kuna danaystaaye
Cidkaleba kolkuu dayriyee daaqad laga tuuray
Dibjirrada tolkiis ahi ay shaqo u doontaane;
Dagaal-oogihii ina garaad dirirta xoogeeye
" bush house" dagaalkuu ka wado dunidi aafaye;
Dacarta iyo waabayda iyo sumuhu daacaayo
Dicaayadaha uu fidinayiyo dad isku soofaynta
Dogobyada baxaayuu ku hurin dab & baansiine;
Waa nimanba diin qabana-hayn ama damiir noole
Waa nimaan dareenkiis wadani diirin weligiise
Waa nin uun diyaar wuxuu u yahay dulan islaameede;
Qaran iyo wuxuu diidan yahay dawladnimadiiye
Sharci iyo wuxuu diidan yahay daalin qabadkiiye
Weligiis wuxuu diidan yahay kala damayntiiye;
Dembiilihii wuxuu diidan yahay dabagalkiisiiye
Danwadaagi buu diidan yahay deris wanaagiiye
Oo wuxuu kaloo diidan yahay dib u heshiisiine;
Dalkii lagu habsaday buu rabaa inuu dulsaaraane
Daariyo guryii buu rabaa inuu dekeyaaye
Beeraha daroogiyo inuu dalag ku beertaaye;
Duur-joogti iyo geedihii dibad u dhoofshaaye
Dadkii laga badnaa buu rabaa inuu dullaystaaye
Xaqoodii intuu duutiyana baad ka daabuloe;
Dadkii kala dideen ma aanu rabo dib isu keenkoode
Dab inaan la kala qaadan buu dooni abidkiiye
Wuxuu doonayaa inu adduun saa daa'imoe;
Dooxada jubaa iyo Markiyo Xamar deegaankeeda
Kuwaa diinta ku qaraabanoo kana dagaalaaya
Dal balaarsi beey doonayaan iyo degaan boobe;
Dagaalyahankiyow inna garaad dirici reer Cayre
Doonida sabbayneysa ood diirada u hayso
Dabayluhu sitaan oo misana dakhalkii uu liicay
Bal iyana halkay kugula degi la arki dooneeye.

abdurahman abdi

(iniahmed@hotmail.com)

Mid ka mid ah xubnaha joogtada ah ee isbaheysiga dib u xoreynta oo maanta eedeyn kulul u jeediyay Sheekh Yuusuf Indhacadde

Mas’uul lagu magacaabo C/llaahi Sheekh Maxamed (Pakistan), oo maanta shir jaraa’id ku qabtay Hotelka La-siesta ee magaalada Jabuuti, ayaa eedeyn ba’an u jeediyay xoghayaha difaaca isbaheysiga dib u xoreynta dalka Soomaaliya, isagoo ku eedeeyey in ciidamo uu si gaar ah u leeyahay ay shalay si qalad ah oo aan la fileyn ay ku galeen magaalada Xudur ee xarunta gobolkaasi Bakool ee dalka Somalia.

Mas’uulkan oo ka mid ah xubnaha joogtada ah ee xubnaha golaha dhexe ee isbaheysiga dib u xoreynta ayaa ku tilmaamay falkii ay shalay ku galeen ciidamo uu sheegay inuu horkacayay Sheekh Indhacadde uu ahaa mid xad gudub ku ah habka dadka ku dhaqan Bakool, gaar ahaana Xudur, waxa uuna si gaar ah farta ugu fiiqay khal khalkii iyo amni daradii shalay ka dhacday halkaasi markii ay ciidamadaasi gudaha u galeen iyo sidoo kale boob uu sheegay inay u geysteen hanti dad shacab ah.

“Ciidamada shalay galay Xudur, waxaan cadeynayaa in aysan aheyn kuwii horey jihaadka uga waday degaanadaasi una dhashay, ee waa kuwo uu wato Yuusuf Indhacadde oo la ogyahay inuu khilaafsan yahay kana amar qaadanin madaxda isbaheysiga ee jihaadka ka wada degaanadaasi, waxaana uga digeynaa inay ku sii sugnaadaan ciidamada Indhacadde Bakool, haddii uu sii joogana waxaa dhici karta cawaaqib xun” ayuu si kulul u yiri Mr. Pakistan.

Sidoo kale, Pakistan ayaa sheegay in degaanadaasi aaney horey uga jirin wax maamul ah oo ay leedahay dowladda C/llaahi Yuusuf isla markaana uu halkaasi ka jiray maamul ay sameysteen dadka degaanka isla markaana wada shaqeyn dhow ay kala dhaxeysay kooxaha ka horjeeda Itoobiyaanka iyo dabadhilifyada.

Yuusuf Indhacadde haddii uu wax nabadeynayo gobolka uu joogo ee Sh/hoose waxaa jooga Xabashi iyo dabadhilifyo welina waxaa yaala isbaarooyin, marka hore waa inuu halkaas ka xoreeyo Xabashida iyo dabadhilifka, degaanadan nabada ah waa in uusan nabad darro iyo khal khal ka abuurin, waxaana ugu baaqayaa inuu si deg deg ah ugala boxo ciidamadiisa”
ayuu yiri ugu dambeyntii C/llaahi Sheekh Max’ed oo ku magac dheer Pakistan.

Hadalkan ka soo yeeray mas’uulkan ka tirsan isbaheysiga dib u xoreynta ayaa tilmaan u noqonaya khilaafka u dhaxeeya xubnaha ku sugan gudaha dalka Soomaaliya iyo weliba kuwo ku sugan Jabuuti ee uu hogaamiyo Sheekh Shariif, iyadoo Sheekh Yuusuf Max’ed Siyaad Indhacaddena uu horay gaashaanka ugu daruuray heshiiskii ay Jabuuti ku wada gaareen dowladda C/llaahi Yuusuf iyo isbaheysiga dib u xoreynta isagoo ku tilmaamay mid xaaraan ah.

Garaadcadde Di Jabuuti

garaadcadde@hotmail.com

Mas'uul Sare oo ka tirsan Xukuumadda Federalka Somalia oo Shaaca ka qaaday inay Dowladda Maraykanka ku wareejin doonaan Xasan Daahir Aweys.

Caydiid C/llaahi Ilka-xanaf, oo ah Ra'isul-wasaare-ku-xigeenka iyo Wasiirka Waxbarashadda, Caafimaadka iyo Hiddaha ee DFKMGS, ayaa hadalkaasi ku sheegay Wareysi Khaas ah oo maanta lagu soo daabacay Website-ka Al-arabiyah.net, wuxuuna sheegay in Dawladaha Mareykanka iyo Somalia ay iska kaashan doonaan sidii loo gacan galin lahaa Xasan Dahir oo ku jira liiska Xubno uu Mareykanku ka raadinayo G/Afrika.

"Waxaa yaraaday hawlgalladdii hubeysanaa ee Muqdisho, tan iyo markii la saxiixay Heshiiska Jabuuti, waxaana sii wadi doonaa dhabaha Wada-xaajoodka lagula galayo Kooxaha kale" ayuu yiri Caydiid C/llaahi, oo intaasi ku daray in loo baahan yahay inay kooxaha hubeysan hubka iska dhigaan, kuna soo biiraan Wada-xaajoodka.

Dhinaca kale Isagoo arrintaasi sii ambaqaadaya, waxa uu carrabka ku dhuftay inuu Guddoomiyaha Guddiga Fulinta ee Isbahaysiga Dib-u-xorreynta Somalia, Sheekh Shariif Sheekh Axmed door siyaasadeed weyn ku leeyahay Dowladda haatan ka jirta dalka Somalia iyo Geeddi-socodka Nabadda , waxaana uu ugu baaqay in aanu cidina kala baqin waxa uu aaminsanyahay.

Raisul-wasaare-ku-xigeenka iyo Wasiirka Waxbarashadda, Caafimaadka iyo Hiddaha ee DFKMGS, waxa uu Wareysigiisa ku soo bandhigay inay qaar ka mid ah Qabaa'illada Soomaalida kala shaqeynayaan Dowladda Maraykanka sidii ay ugala shaqeyn lahaayeen is-dhaafsiga Macluumaadka la xiriira Dembiilayaasha lagu raad-joogo, wuxuuna sheegay in iskaashigaasi horseeday hawlgalkii ugu dambeeyey ee lagu dilay Hoggaamiyihii Dhaqdhaqaaqa Al-shabaab, Marxuum Aadan Xaahi Cayrow, oo uu sheegay inuu ka mid ahaa Dembiilayaasha ay Maamulka Maraykanka sida xooggan uga baadi-goobayeen magaalladda Muqdisho, waa sida uu hadalka u dhigay.

Si kastaba Wareysigaan ayuu sidoo kale kaga hadlay wajiga labaad ee wada xaajoodka lagu qabanayo Magaalada Barakeysan ee Makka Al-mukarama , waxaana uu sheegay in uu yahay dhamaystirka rajada Somalia .

Tafatiraha Wargeyska Banaadir Post.
Mohamed Deeq Xaaji Ali.
uk

Ciidamo Itoobiyaan ah oo aad u fara badan oo xalay u jiheystay dhanka gobalka Galgaduud.

Dad ku sugan deegaanada Kala Beydh iyo Jawiil ee gobalka Hiiraan ayaa ku war bixiyay in xalay saqdii dhexe ay ciidamo Itoobiyaan ah oo deegaanadaa ku sugnaa faaruqiyeen iyagoona u jiheystay dhanka gobalka Galgaduud.

Lama garanayo ujeedka rasmiga ah ee ciidamadani ugu baqooleen gobalka Galgaduud,waxaase bixitaankoodu uu kusoo beegmay saacad uun kadib markii uu xalay soo idlaaday dagaal xoogan oo ciidamada nabad ilaalinta iyo kooxda Al Shabaab ku dhex maray degmada Guri ceel,iyadoo dagalkaasina uu kusoo dhamaaday ciidamada nabad ilaalinta oo deegaanka oo dhan gacanta ku dhigay, hub aad u badana ku arkay magaaadaas, waxeyna ku dhigeen gacanta.

Ma jiraan wax warar ah oo kasoo baxay saraakiisha Itoobiyaanka iyo dowladda federalka Soomaaliya oo ku aadan sababaha ciidamadani ugu ruuqaansadeen dhanka gobalka Galgaduud iyo waliba mudada ay qaadan doonto howsha ay halkaa u aadeen,laakinse saacadaha soo socda ayaa la filayaa in war buuxa uu soo boxo.

Banaadir Post.

Xamar cade.

XASAN DAAHIR AWEYS OO HORTAGAAN NABADDA IYO BIXITAANKA CIIDAMADA ETHIOBIYA

Maalmahaan dambe, waxaa si isdabajoog ah loo maqlaayey hadallo lagu diidanyahay natiijooyinka laga soo saaray shirki dibuheshiinta ee shirki Jibuuti, hadalladaas oo ka soo baxay ninka seef la boodka ah ee Xasan Daahir Aweys iyo kuwa asiga ku xiran oo gar-maqaatayaalka ah, kana soo horjeeda in Soomaaliya ay ka hirgesho nabad uu dalka ku xasilo.

Kooxdaan diiddan nabad ka dhalata Soomaaliya oo u hoggaaminayo ina Daahir Aweys, oo saldhig ka dhigtay magaalada Casmara, waxay si ay ku jirto indha'adeegnimo iyo xishood la'aan ku sheeganayaan inay ayaga yihiin kuwa raba inay Soomaaliya badbaadiyaan, waxayna iska indha-tirayaan dhibaatooyinka baaxadda leh oo ay sababeen dagaallada micna darrada ah oo ay ka wadaan dalka gudahiisa dagaalladaan oo u geysanaya shacabka Soomaaliya dhibaatooyin adag.

Hasan Daahir asigoo laga fahmayo inu ku faraxsanyahay sida ay dagaallada u socdaan iyo dhibaatooyinka ay dadweynaha u geysanayaan, wuxu mar walba ugu soo celcelinaya si jeesjees ah hadalladiisa beenta ah, sida "waan dagaallamayna, heshiisna ma qaadanayno inta ciidamada Ethiobiya ay ku jiraan gudaha Soomaaliya" taas waa marmarsiinyo raqiis ah oo been ku saleysan, maxaa yeelay ninkaan iyo kooxdiisa dagallada ay wadaan sabab uma ah joogitaanka ciidamada Ethiobiya.

Way sahlantahay si loo fahmo in Xasan Daahir uu yahay beenlow ma xishoode ah, oo dagaal ooge ah, madaama uu ninkaan ka waday gudaha Soomaaliay dagaallada u danahiisa u gaarka ah ku watay ka hor intaysan ciidamada Ethiobiya soo gelin Soomaaliya, mana joojinayo ninkaan dagaallada u ku wato danahiisa iyo danaha beeshisa, xataa haddii Soomaaliya laga wada bixiyo ciidamada Ethiobiya iyo ciidamada shisheeyaha kale.

Maxaa yeelay dagaallada u Xasan Daahir ka wado Soomaaliya waa dagaal u ku doonayo inu xukun qabsado, mana ahan dagaallo bilowday kaddib markay ciidamada Ethiobiya ay soo galeen dalka Soomaaliya, kumana xirnana joogitaanka ciidanka dawladda Adisabeba, waana been hadallada u mar walba la soo boodayo ina Daahir oo ah "dagaallada waan wadayna ilaa ay ka baxaan ciidamada Ethiobiya" hadalladaas oo dadka qaarkiisa ay u qaadanayaan in dagaallada ay joogsanayaan mar haddii Ethiobiya ay la baxdo ciidamadeeda, taas waa been wax kama jiraan ah, waxaana lagu marin-habaabinaya shacabka war moogga ah. Xasan waa nin nabad diid ah oo mar walba dagaal u joog ah.

Waa kuwaan hoos ku qoran meelaha ka mid ah gobollada Soomaaliya oo u Xasan Daahir dagaallada ka huriyey ka hor intaysan ciidamada Ethiobiya soo gelin gudaha Soomaliya.

A)-Ka hor dhismaha dawladdaan kmg- waxaa la xasuusanyahay:

1-dagaallada u Xasan Daahir ku qaaday gobolka Shabeellaha Hoose asigoo hoggaaminayey maleshooyin ay isku beel yihiin, xoogna ku qabsaday gobolkaas, ilaa haddeerna weli xoog ku haysta, ujeeddadiisana waxa waye inuu beeshiisa xoog ku dejiyo gobolkaas.

2-waxa kale oo la xasuusanyahay dagaallada ahaa isku day qabsasho gobol u Xasan ku qaaday gobolka Bosaaso, asigoo sheeganayey hoggaamiye ciidamo maxkamado Islaami.

3-Waxa la xasuusanyahay duullaanki lagu qaaday laguna qabsaday gobolka Jubbada Hoose duullankaas oo loo adeegsaday maleeshiyo beeleed oo ka ammar qaadanayey ina Daahir ayna hor-kacayeen labada nin oo ay isku beesha yihiin oo la kala yiraahdo: Seeraar iyo Goobaanle.
Waxaana la ogyahay in dhammaan gobollada kor ku xusan oo u Xasan Daahir dagaalada ka huriyey inaysan ka jirin meel ay ku sugnayeen ciidamo Ethiobiyaan ah, mise xataa ciidamo shisheeye kale.

B)-Kaddib dhismaha dawladdaan kmg. Waxaa la xasuusanyahay:

1-dagaallada u Xasan ka oogay gobollada Hiiraan, Galgaduud, Mudug ilaa meelo ka mid ah gobollada Puntland.

2-waxa la ogyahay inuu ahaa ninkaan kii ka dambeyey dagaaalladi lagu qaaday gobollada Jubbooyinka laguna burburiyey isbaheysigii dooxada Jubba.

3-Waxaa lama illoowaan ah hadalladii Xasan Turki oo ka mid ah ragga ka ammar qaata Xasan Daahir.

Hadallada Xasan Turki oo hoggaaminayey maleeshooyin duullaan ku aha Baydhoba waxa ka mid ah:

"kuwa sheeganaya dowladnimada oo deggan Baydhoba waxaan ku qasbeenna inay dhawaan boorsooyinkooda kala cararaan magaaladaas".

Sida la ogyahayna waqtigaas oo maleshooyinka ka ammar-qaadanayey Xasan Daahir ay weerarrada isdaba-jooga ah ku qaadayeen meelaha kor ku xusan, gaar ahaan marka duullaanka lagu aha dawladda kmg oo u fadhigeeda aha magaalada Baydhoba, ma jirin meel ka mid ah Soomaaliya gudaheeda oo ay ku sugnayeen ciidamo Ethiobiyaan.

Dagaalladaan kor ku xusan oo u Xasan Daahir ka huriyey gobollada Soomaaliya ilaa haddeerna weli socda, sida la ogyahay waxay shacabka Soomaaliya u geysteen dhibaatooyin baaxad leh oo naf iyo maalba ah, waxayna sababeen dagaalladaan, qax iyo barakac ballaaran, mana la qiyaasi karo inta ay la egyahiin qasaarooyinka ay sababeen xaaladahaas qaxaha iyo barakaca keenay.

Xasan weli wuu wada dagaallada naafeyey ummadda Soomaaliyeed, wuxuuna ku marmarsoonaya inu la dagaallamayo ciidanka Ethiobiya, ha yeeshee taasi waa mid been ah, maxaa yeelay sida an kor ku xusnay ina Daahir wuxuu dagaallada waday waqti ciidamo Ethiobiyaan ah mise ciidamo shisheeye kal aysan Soomaaliya ku jirin.

Waa la wada fahamsanyahay ujeeddada ay ka leeyahiin Xasan Daahir iyo kuwa ay isku beesha yihiin dagaalladaan foosha xun oo ay ka wada oogeen dhammaan gobollada Soomaaliya, ujeeddadaas waxay waaye inay ayaga gacanta ku dhigaan talada dalkaan, mise in ayaga ay wada burburiyaan dalkaan iyo dadkiisaba. Marka shacabka waa inuu sidaas u fahmo, Xasan Daahir waa nin xukun doon ah, sidaas daraadeeda madaama usan xukunka ku heli karin shirar iyo wada xajood, wuxu dagaallada u wado inu talada xoog ku qabsado,wana ka soo horjeeda in shir laysugu yimaado oo heshiis la gaaro, madaama u ogyahay in heshiis la wada gaaray u asiga ku gaareynin danta u wato.

Haddaba, dhab ahaanti Xasan Daahir waaba ka soo horjeeda bixitaanka ciidamada Ethiobiya, laba sababo oo jira awgood:

1-Midda hore oo ah tan an kor ku soo qornay, Xasan Daahir madaama ay u cadday in heshiis iyo nabad usan ku gaareynin danaha u wato oo ah xukun qabsasho, wuxu mar walba dagaallo u kicinaya si ay nabadda ku fogaato, asigoo rajeynayo inay u suuragasho inuu talada dalka uu xoog ku qabsado.

Dhinaca kale wuxuu rabaa in colaadaha iyo fowdada ay bataan si an looga maarmin joogitaanka ciidamada Ethiobiya, madaama u ogyahay in haddii Soomaaliya nabadi ka dhalato oo u dalka xasilo in ciidamada Ethiobiya ay iska baxayaan.

2-Sababta labaad oo u Xasan Daahir Aweys u diidanyahay in ciidamada Ethiobiya laga bixiyo gudaha dalka Soomaaliya waa midda la xiriirta danaha dawladda Eritreya oo ay martida u yihiin Xasan iyo kooxdiisa. Sida an marar badan hore u soo xusay, lana wada ogyahay, dawladda Casmara waxaa danteeda ah in ciidamada Ethiobiya ay ku si negaadaan gudaha Soomaaliya, waana taas sababta u madaxweynaha Eritreya, Afawarki ugu martigeliyey magaalada Casmara kooxda sheeganayso mucaarad ka soo horjeeda dawladda Soomaaliya, Afawarki ma rabo in Ethiobiya ay ciidamadeeda kala baxdo Soomaaliya, sidaas daraadeeda madaxweyhnaha Eritreya wuxu ka shaqeynaya in dagaallada ka jira gudaha Soomaaliya ay si bataan siina xogeystaan, si halkaas ciidamada Ethiobiya ay mashquul ugu si ahadaan. Sida muuqatana madaxweyne Afawarki waxa si fiican ugu hirgashay inu u adeegsado Xasan Daahir iyo kooxdiisa fulinta danta u ka leeyahay joogitaanka ciidamada Ethiobiya ee gudaha Soomaaliya, madaama ina Daahir iyo kuwa ku xiran ay yihiin kuwa hurinaya dagaallada ka socda gobollada Soomaaliya, arrintaas oo ka dhigaysa lagama maarmaan joogitaanka ciimadaas.

Cali Cumar:

sablaale@hotmail.com

Ciidamo gurmad ah iyo gawaari dagaal oo gaaray magaalada Xudur ee Gobolka Bakool

Gawaari dagaal oo gaaraya 15 oo ay saaran yihiin Ciidamo ka tirsan Dowladda Federaalka Soomaaliya ayaa gaaray Magaalada Xudur ee Gobolka Bakool halkaas oo shalay dagaalo xoogan ay ku dhex mareen Ciidamada Dowladda iyo kooxo ka tirsan Ururka Al-Shabaab ee ka soo horjeeda Dowladda iyo joogitaanka Ciidamada Itoobiya.

Ciidamadan ayaa la sheegay in ay yihiin kuwo lagu xoojinaayo ciidamada gobolka ee halkaasi dib ugu laabtay shalay kadib markii ay ka baxeen maliishiyada Ururka Al-Shabaab ee weerar ku soo qaaday degmadaasi, dhaawacayna Guddoomiyaha degmada Maxamed Macallin iyo tiro kale oo ciidamada ka tirsan, iyadoo ay ka kaxeysteen magaalada labo shaqaale ajnabi ah oo howlo lagula dagaalamo miinooyinka ka waday gobolkaasi balse dib u sii daayey.

Guddoomiyaha Gobolka Bakool Maxamed Cabdi Toll oo shalay ka maqnaa xiligii weerarka lagu qabsaday Xudur ayaa gaaray magaalada Xudur isaga iyo ciidamo uu horkacayo kuwaasi oo aad u adkeeyay amaanka magaalada Xudur iyo kontoroolada laga soo galo, waxaana magaalada ay haatan tahay mid degan.

Shaqaalihii laga afduubtay iyo hey'addihii samafalka ee ka howlgalayey degmad Xudur ayaa shalay gelinkii danbe ka ambabaxay iyagoo diyaarad ka raacay garoonka degmadaasi, halka qaar kale ay soo aadaan magaalada Baydhabo oo xarun u ah Dowladda KMG.

Banaadir Post.
Xamar Cade
Banaadirpost@gmail.com

Guddomiyaha Gobolka Bakool oo sheegay in ciidamadii shalay soo galay Xudur uu hoggaaminayey Yuusuf Indha Cadde xili maantana ay la wareegeen degmooyin

Maliishiyoon ka tirsan Ururka Al-Shabaab ayaa deegaano hor leh la waraagay xalay iyo saakay kuwaasi oo muhiim u ah Dowladda Federaalka KMG ah ee Soomaaliya, waxayna xalay kooxaha ka soo horjeeda Dowladda ay la wareegeen gacan ku heynta degmada Bardaale oo dhinaca Koonfurueed 30 Km kaga beegan magaalada Baydhabo ee xarunta Baydhabo.

Kooxahan ayaa la sheegay in ay ka tirsan yihiin ururka Al-SHabaab, kuwaasi oo ku hubeysan gaadiid fara badan oo nooca dagaalka ah, mana jirto dhibaato halkaasi laga soo sheegayo.

Sidoo kale Maliishiyooyin la sheegay iney ka tirsan yihiin Maxkamaddaha Islaamiga ayaa waabarigii saakay waxay la wareegeen magaalada Qansax Dheere ee gobolka Bay, halkaasi oo ay si nabadgelyo ah ula wareegeen, iyagoo fariisimo ciidan ay ka sameysteen gudaha magaalada iyo kontoroolada laga soo galo degmada Qansax Dheere.

Guddoomiyaha Gobolka Bakool Maxamed Cabdi Toll ayaa Saxaafadda u sheegay in maliishiyooyinkii shalay soo weeraray Xudur uu hoggaaminayey isagoo ku eedeeyey weerarkii shalay ururka Al-Shabaab.

Degmooyinkan ay la wareegeen Maxkamaddaha Islaamiga iyo ururka Al-Shabaab ayaa xarunta Baarlamaanka Soomaaliyeed ee Baydhabo ay u jiraan in ka yar 40 Km, iyadoo magaalada Bardaale 30-Km dhinaca koonfureed ay kaga beegan tahay magaalada Baydhabo, walow marka ay kooxahan la wareegaan gacan ku heynta degmooyinka aysan ku waarin oo saacado kadib ay dib ugu baxaan cabsi ay ka qabaan weeraro rogaal celis ah oo kaga yimaada maamulka degmooyinka iyo Dowladda KMG.

Waxaa la yaab leh, sida wax yihiin, Federaalku ma fiirsanayaan sida wax yihiin, mise wax kale oo qarsoon ayaa jira.
Bal waxa xiga ha la dhowro.

Banaadir Post.
banaadirpost@gmail.com

Dagaal xalay ka dhacay Degmada Guriceel ee Gobolka Galgaduud

Wararka naga soo gaaraya Degmada Guriceel ee Gobolka Galgaduud ayaa waxay sheegayaan in xalay uu halkaas ka dhacay dagaal socday muddo 30 daqiiqo ah, kaasi oo dhexmaray Ciidamo Itoobiyaan ah oo shalay gaaray Degmada Guriceel iyo kooxo hubeysan oo ka soo horjeeda.

Dagaalkan ayaa wuxuu geystay khasaare dhimasho iyo dhaawac isugu jira oo soo gaaray dad rayid ah oo guryahooda iska joogay, waxaana ilaa iyo haatan la xaqiijiyay dhimashada afar ruux iyo dhaawac soo gaaray afar ruux oo kale, kuwaasi oo ay guryahooda ugu tageen madaafiic ay markii la weeraray ku jawaabeen Ciidamada Itoobiyaanka.

Dagaalka ka dhacay Degmada Guriceel ayaa wuxuu sidoo kale saameyn ku yeeshay Dadkii degmada ku dhaqnaa, kuwaasi oo qaarkood ay u carareen dhulka howdka ah ee Degmada u dhow, halka kuwo kalena ay aadeen dhinaca Degmada Dhuusa-mareeb ee isla gobolka Galgaduud. Waxaa xusid mudan in dadkaas barakacay ay ku jiray kuwo horay uga barakacay Magaalada Muqdisho oo sidoo kale ka cararay Ciidamada Itoobiyaanka ah ee ku sugan Magaalada Muqdisho.

Marka laga soo tago dadkii dagaalka ku dhintay waxaa kuwii ku dhaawacmay lagu daweynayaa Isbitaalka Istarliin ee Degmada Guriceel, iyadoo daweyntoodana ay gacanta ku hayaan Dhaqaatiir iyo kalkaaliyayaal Isbitaalkaas ka howlgala.

Wararkii ugu dambeeyay ee saaka naga soo gaaray Degmada Guriceel waxay sheegayaan in dadka ay isu diyaarinayaan in ay magaalada ka barakacaan, iyagoo ka baqaya in ay Ciidamada Itoobiyaanka gudaha u soo galaan, isla markaana ay dhibaato u geystaan.

Waxaa muuqanaya in hada la helay dad kala halkaas kala dagaala Itoopiyaanka, kaasoo aan horey uga jiri jirin Degmooyinkaas.

Waxaa arkaysaa in tageen halkaas kuwa dagaalka xawila una Xawila dhul nabad horey u ahaan jirey.

Banaadir Post
Xamar cade.

C/fitaax Shaaweey"cidii aan kuqabano hub sharci daro ah talaabo ayee ku qaadeysaa DF"

Maamulka gobolka Banaadir ayaa waxa uu sheegay in ay talaabo ka qaadayaan cidii lagu arka iyadoo lacag Sharci daro ah ka qaadeysa dadka iyo gaadiidka kala duwan ee isticmaala qeybo ka mid ah wadooyinka Magaalada Muqdisho.

Guddomiye ku xigeenka dhinaca amaanka ee maamulka gobolka Banaadir C/fitaax Ibraahim Cumar Sabriye Shaaweey oo u waramayay Saxaafada ayaa waxa uu sheegay in ay talaabo ka qaadayaan cidii qaadeysa lacag aan sharci aheyn xili ay soo badanayaan kooxo ku libisan dareyska Ciidamada dowlada KMG oo gaadidka iyo dadka ka qaadaya lacag aan sharci aheyn.

C/fitaax Shaaweey ayaa sheegay in shacabka looga baahanyahay in ay soo sheegaan cidii ay arkaan iyadoo qaadeysa lacag aan sharci aheyn islamar ahaantaana talaabo ayaan ka qaadaynaa ayuu yiri C/fitaax Shaawey ,waxaana jirta in gadiidka xamuulka iyo kuwa Bl-ka ay ka cabanayaan kooxo ku libisan dareyska ciidamada dowlada KMG oo ka qaadaya lacag aan sharci aheyn.

Hadalka ka soo baxay Maamulka Gobolka Banaadir ayaa waxa ay ku soo beegmaysaa xili Shalay xoogaga Alshabaab ay Weerar Culus ku qaadeen ciidamo ka tirsan kuwa dowlada KMG ee ku sugnaa Contorol lagu magacaabo Sarkuusta oo ku dhaw Xerada Asluubta oo fariisin u ah Ciidamada Ethiopia,waxanaa dagaalkaasi uu sababay dhimasho iyo dhaawac halkaasi oo gaadiidka isticmaala wadadasi looga qaadi jiray Lacago canshuuro ah.

Banaadir Post

Xamar cade.

Xawaaladda Mustaqbal oo Al-Shabaab ugu deeqday konton kun oo dollar.

Waxaa yaab leh kuwa wax xawila iney dhiibaan lacagaha dadka Soomaaliyeed lagu gumaado, waxaa kaloo yab leh, in lacagtaas lagu gumado Aqoonyahan, Culimo u diin, kuwa u shaqeeya dowlada federaalka,Booliskii Qaranka Soomaliyeed ee waaya araga ahaa, sida odayaashii doraad Dayniile lagu diley,oo ay Soomaalida inta nadiifka ahi la yaabtey.

Waxaa kaloo lacagaahaas dhiiba, Kuwa Isgaarsiinta, Shirkadaha Diyaaradaha, iyo Ganacsato caan ah oo aad looga yaqaan somalia Sanadihii dagaalka ka jirey Somalia.

CSI.
london

Al-Shabaab oo waxyaabo lala yaabay bilaabay geeridii Adan Ceyroow kadib

Xoogaga Al-Shabaab ayaa gudaha Soomaaliya ka bilaabay afduubyo ay ku bartilmaameedsanayaan Samafalayaal isugu jira Somali iyo ajnabi.

Samafalayaasha u afduubaan Xarakadda Al-Shabaab oo laga xusi karo madaxa Hay'ada UNHCR Muqdisho Mudane Maxamed Xasan Cali (Keynaan) iyo sedex kale oo u kala dhashay dalalka Ingiriiska,Talyaniga iyo Kenya ayey sii deyntooda ku xireen madax furasha qofkiiba dhan Nus Milyan dollar.

Gulluf la doonayay in lagu sii daayo Samafal Soomaaliga ee lagu magacaabo Keynaan ayaa lagu guuldareystay ka gadaal markii uu Mukhtaar Rooboow Cali (Abuu Maansuur) ku xiray sharuud lacageed sida ay Waagacusub u sheegeen ila wareedyo kala duwan.

"Halku dhigii Al-Shabaab wuxuu ahaa:- XABSI MALEH XABAAL MOOYEE' laakiin tan iyo markii uu geeriyooday hogaamiyahoodii Aadan Xaashi Ceyroow waxaa isbedelay halku dhigii oo hada u muuqdo"XUSHMAD MALEH XOOLO MOOYEE"sidaasna waxaan ku cabiray afduubyada,boobka iyo falalka u dhigma ee ay ku kacayaan"ayuu yiri mid ka mida culumaa'udiinka Soomaaliyeed oo magaciisa qariyay.

"Kooxaha Al-Shabaab ee samafalayaasha afduubka ku heystay waxaa la leeyahay waa qaar ka falaagoobay halka warar kalena ay leeyihiin,waxaa wajahday dhaqaale daro,wayna ku adkaatay inay dagaalada sii wadaan sidaas ayey u bartilmaameedsanayaan samafalayaasha"ayuu yiri aqoonyahan ku sugan Muqdisho oo xaalad amaan isu qariyay.

Al-Shabaab waxaa hore loogu yaqiin go-aan qaadasho khaarijin qofkii ay ka shakiyaan hasse yeeshee waxay todobaadyadii la soo dhaafay bilaabeen falal lala yaabo oo ku beegan geeridii Macalinkoodii Aadan Xaashi Ceyroow,allaha u naxariistee.

Tilaabooyinka Afduub ee garabka Mukhtaar Rooboow Cali ku doonayaan madax furasho laga siiyo Maxamed Keynaan iyo ajnabiyiinta kale waxay sabab kaga dhigeen dhaqaalo daro.

Hogaamiyeyaasha Al-Shabaab waxay 30 Maalmood ka hor dalbadeen taageero dhaqaale oo ay weydiisteen Shirkadaha Soomaaliya sida Xawaaladaha,Isgaarsiinta iyo ganacsiga guud,waxaana qaarkood ka biyo diidayaan inay bixiyaan dhaqaalaha laga doonayo waloow ay mar walbana qabaan cabsi la xiriirto,tilaabada ka dhalan karta hadii ay laalaan codsiyada horyaal.

Banaadir Post.

London

Uk

Dowladda federalka oo jawaab ka bixisay hadal kasoo yeeray AL-QAACIDA

Afhayeenkan oo lagu magacaabo Abuu Yaxya Al-liibi, ayaa hadalkaasi ku sheegay Cajallad codeed la soo dhigay barta Internet-ka ee Al-qaacida leedahay, wuxuuna sheegay inaan la aqoonsan doonin Heshiiskii Nabadda ee ay DFKMGS iyo xubno ka tirsan Hoggaanka Isbahaysiga Dib-u-xorreynta dalka Somalia ay bishan June 9-dii ku kala saxiixdeen dalka Jabuuti.

Abuu Yaxya Al-liibi, waxa uu farriintiisa kula hadlay Kooxaha Islaamiyiinta ee ka soo horjeeda DFKMGS iyo Ciiddamadda Ethiopianka inay sii kordhiyaan dagaalkooda, isla markaana aanay aqoonsanin Natiijadda Heshiiskii Jabuuti.

Haddaba, Wasiirka Arrimaha Dibedda ee DFKMGS, Cali Jaamac Axmed, ayaa si kulul u naqdiyey baaqii Mas\'uulkaasi ka tirsan Ururka Al-qaacida, wuxuuna sheegay inuu hadalkaasi muujinayo sida ay Al-qaacida uga soo horjeedo Heshiiska Nabada ee ay DFKMGS iyo Isbahaysiga ARS gaareen, kaasi oo ay QM ka soo shaqeysay.

Wasiirka oo haatan booqasho ku jooga dalka Masar, waxa uu carrabka ku dhuftay inay jiraan xubno taabacsan Ururka Al-qaacida oo ku sugan yihiin gudaha daka Somalia, waa sida uu hadalka u yiri, wuxuuna tilmaamay inay Canaasiirtaasi mas'uul ka yihiin qalalaasaha iyo colaadaha ka aloosan dalka Somalia.

Isagoo arrintaasi sii ambaqaadayo, waxa uu tilmaamay inay Kooxaha taabacsan Al-qaacida carqalladayn joogto ah ku hayaan isku-day kasta oo ay Beesha Caalamka ku doonayaan sidii lagu xaqiijin lahaa Ammaanka iyo Nabadda dalka Somalia, waa sida uu hadalka u yiri, wuxuuna ku tilmaamay Kooxdaasi kuwo aan kheyr la doonaynin Somalia.

Banaadir Post

Brusels,

Xaraan ku naxayaasha ka faa'ideystay dagaalada sokeeye, bililiqeystayna hantidii umada Somaliyeed.

Burburkii iyo bililiqadii hantida yare ee maantay dalka taal inta haysata badi waa dagaal ku taajir ama xaraan kunax, loona yaqaan ganacsato , kasoo aan inaba laheen dareen qaranimo, dawladnimana hadalkeeda daa.

Xaraan kunaxayashaas waa kuwa hortaagan in markale dib lo arko Haybadii iyo sharaftii umada Somaliyeed lagu yiqiinay, ayagoo xirfad ka dhigtay dhulkaan bur buray sidii dhaqqalo aay oga sameysan lahaayeen.

Xaraan ku naxayaashaas loogu yeero Ganacsato waa kuwa ku howlan dabar gooynta dhirtii nolosha umada Somaliyeed asaaska u ahayd, waa kuwa ku howlan dhoofinta wixii ka haray ugaadha iyo xoolah dhiddiga ah, waa kuwa ku howlan qiima tirka shilinka Somaliga ayagoo kensada lacag been –abuur ah oo lagu dhibaatenayo Shacabka Somaliyeed.

Xirfada xaraan ku naxayaashas waxaa kaloo ka mid ah dadkii oo lagu sumaynyo dawooyin dhacay iyo cunto waqtigeedi dhaftay oo dhacday isla mrkaasna ay tahay in la daadiyo.

Hadaba xaraan ku naxayaashaas ku taajirtay bililiqada iyo sharci la’aanta waxay la tahay in ay dantoodu ku jirto dowladla’aanta iyo dal ay keligood hantilayaal ka yihiin, ciday doonaana kharajiyaan waa sababta ragaas aanu soo sheegnay ugu howlan yihiin fidmada iyo ka hortagga Dowladnimo ineey abid soo noqto, Adeegsanayana hantidii ay xaaraanta iyo boobka ku heleen.

Banaadir Post.
Xamar Cade.

Muqdisho: Madaxweynaha Dowladda Federaalka Soomaaliya iyo wafdi uu hoggaaminayo oo u ambabaxay dalka Masar

Madaxweynaha Dowladda Federaalka KMG ah ee Somalia Md. C/llaahi Yuusuf Axmed iyo wafdi Ballaaran oo uu hoggaaminayo ayaa maanta ka ambabaxay magaalada Muqdisho iyagoo ku sii jeeda dalka Masar.

Socdaalka Madaxweynaha oo ku wajahan dalka Masar ayaa waxaa ay horay u sii marayeen Magaalada Nairobi ee dalka Kenya, iyagoo la filayo in beri ay gaaraan magaalada loo dalxiis tago ee Sharma Khiikh oo ka socda shirka madaxda dalalka Afrika oo la filayo in arrimaha ugu horeeya ee looga hadlayo ay kow ka tahay arrimaha dalka Soomaaliya.

Markii ay gaareen magaalada Nairobi ee dalka Kenya ayaa waxaa si diiran halkaasi ugu soo dhoweeyay saraakiil sare oo ka tirsan Madaxtooyadda dalka Kenya iyo safaaradda Soomaaliya ee Kenya.

Sidoo kale warar kale oo soo baxaya ayaa waxay sheegayaan in marka uu soo xermo shirka madaxda Afrika uu Madaxweynaha tegi doono Boqortooyadda Sacuudi Carabiya halkaasi oo la filayo in 30-ka bisha isugu tagaan xubnaha heshiiska ku saxiixay dalka Jabuuti.

Ka hor inta uusan Madaxweynaha ka ambabixin garoonka Muqdisho ayaa aad loo adkeeyay amaanka wadooyinka soo gala garoonka waxaana amaanka wadooyinkaasi sugayey ciidamada Dowladda KMG iyo kuwa AMISOM oo xayiray isu socodka dadka iyo gaadiidka, mana dhicin wax ka horyimid......

Banaadir Post.

Xamar Cade.

C/raxiin Muudey “Sh Shariif iyo Sh Xasan Daahirba xilalkii maxkamadaha waa laga qaaday,kadib markii uu khilaafkoodu batay”.

SHekh Cabdi Raxiin Cali Muudey oo horay u ahaa afhayeenkii madkamadaha beelaha midoobay ayaa sheegay in ay xilalkii ka xayuubiyeen labada garab ee is haya ee ku kala sugan Asmara iyo Jabuuti ee Sh Shariif iyo Sh Xasan Daahir ay kala hogaamiyaan.

“Sh Shariif iyo Sh Xasan Daahirba xilalkii maxkamadaha waa laga qaaday,kadib markii uu khilaafkoodu batay,waxaana go’aankaa lagu gaadhay kulan ay yeesheen xubno ka madax banaan dhinacyada is haya”ayuu yiri Sheekh Muudey..

C/axiim Muudey ayaa waxa uu si weyn uga hadlay in Maxaakimtu ay dhawaan soo bandhigi doonaan hogaan cusub oo aan ahayn labada masuul ee siyaasada ku kala fogaaday.

Ma jiraan wali wax warar ah oo kasoo baxay labada masuul ee uu Sh Muudey sheegay in xilalkii laga xayuubiyay,hase ahaatee la arki doonee waxa ay ka yidhaahdaan hadalka culus ee kasoo yeedhay Sh Muudey afhayeenkii hore ee maxkamadaha.

Yaasin Xaaji

Banaadir Post.

G/dhexe Bariise oo ku eedeeyay Al-shabaab in ey qowraceen 10-askari

Afhayeenka Ciiddanka Boliska DFKMGS, ahna Taliyaha Qeybta Boliska ee Weliyow Cadde, G/dhexe C/llaahi Xasan Bariise, ayaa ku eedeeyey Dhaqhaqaaqa hubeysan ee Al-shabaab inay ka dambeeyeen falkii gawraca ahaa ee shalay loo geytay ku dawaad toban askari oo ku sugnaa Saldhigga Boliska ee Degmadda Dayniile.

Afhayeenka oo xalay u waramayey Barnaamijka Sahanka Wararka 24-saacadood ee Sahanmedia, ayaa sheegay inay Kooxda Al-shabaab ee ka soo horjeeda Siyaasadda DFKMGS ka dambeeyeen gawracaasi, wuxuuna falkaasi ku tilmaamay xasuuq ka dhan Aadminimadda.

G/dhexe Bariise, waxa uu carrabka ku dhuftay inay Kooxda Al-shabaab carqalladaynayso Hesiiska Nabadda ee ay DFKMGS iyo Isbahaysiga Dib-u-xorreynta dalka Somalia \"ARS\" bishan 9-dii ku kala saxiixdeen dalka Jabuuti, waa sida uu hadalka u dhigay Sarkaalkaasi, oo isagu dhowr jeer ka badbaaday qaraxyo miino oo lala beegsaday.

Mar wax laga weydiiyey Tallaabadda xigta ee Ciiddanka u qorsheysan sugidda Amamaanka Deegaanka Dayniile, waxa uu ku nuuxnuuxsaday inay Ciiddamo dheeraad ah ku xoojin doonaan Ciiddanka ka hawlgala Saldhigga Boliska ee Deegaanka Dayniile, si looga hortago Kooxaha qaska wada, waa sida uu hadalka u dhigay."Ciiddamo dheeraad ah ayaan ku xoojinaynaa Saldhigga Dayniile, si kooxaha qaska wada looga difaaco dadka rayidka ee ku soo barakacay Deegaankaasi\" ayuu yiri Sarkaalkaasi u hadlay Ciiddanka Boliska DFKMGS.

Afhayeenka Ciiddanka Boliska ee DFKMGS, waxa uu ku edeeyey Dagaalyahannadda Al-shabaab inay boob u geysteen guriga Xildhibaan Maxamed Qanyare Afrax oo ka ag dhawaa Saldhigga Boliska ee Dayniile, waa sida uu hadalka u dhigay.Si kastaba ha ahaatee, weerarkii shalay galab lagu qaaday Saldhigga Boliska ee Deegaanka Dayniile waxaa lagu dilay 9-Askari iyo haween rayid ah oo ku sugnayd Xayndaabka Saldhiggaasi.

Koshin Yare

Banaadir Post.

Xamar cade.

Xaaladda Gobolka SH/hoose waa ceenkee?

Shir jaraaid uu qabtey guddoomiyaha gobolka sh/hoose mudane Cabdulqaadir Sheekh Maxamed nuur , kuna qabtey magaalada Moqdisho ayaa waxuu ku tilmaamey xaaladda nabad gelyada gobolka mid ka soo dartey , taagan fara ka bax, ka dib markii ay kusoo badatey af duubyada loo geysanaayo xabnaha hay'adaha gargaarka ee gobolka ku sugan.

Guddoomiyaha ayaa ahssegey in amaan darrida ay ka dhalatey ciidamada amaanka gobolka oo aan mushaahar qaadan muddo sannad gaareysa, isla markaanaay muddadaasi ku shaqeynayeen iskaa wax qabso, taasi oo dhalisey ayuu yiri inay halkaasi ka timaado debecsanaa xagga amaanka, islamarkaana dowladda federaalka dhankeeda aysan ka helin taageero , xag maaliyad iyo xag wax qabadba.

Mudane C/qaadir ayaa ku tilmaamey amaan darrida gobolka inay tahay mid kasii dareysa maalinba maalinta ka dambeyso,ayada oo ay kusoo badanayaan burcadda iyo kooxo uu ku tilmaamey kooxaha afduuba hay'adaha.

Waxuuna dowladda federaalka ka codsadey inay gacan ku siiyaan sidii loo sugi lahaa amaanka gobolka oo ahaan jirey mid amaankiisa ay sugantahay 99%, waxuuna halkaasi ka sheegey in khilaafkii u dhaxeeyey maamulkiisa iyo kan Banaadir la dhameeyey.

Xubnaha maamulka ayaa caadeystey inay hadba u hadlaan sida ay xaaladda tahay, taasi oo in badan laga maley ayaga oo caddeynaayo inaysan dowladda aqoonsaneen, mararka qaarna sheegaaya inuu gobolka amaan yahay dowladda aan looga baahneyn inay soo fara gelyaan.
Ayada oo la ogyahay guddomiyaha inuu horey u sheegey inaysan gobolka ka jirin amaandarro, kuna dhawaqey inaysan joogjn xubna salka ku haayo al-qaacida, ayada oo dadka gobolka sheegayaan dhaqdhaqaaqyada ka socda deegaannada qaar, ayaa guddoomiyaha ku sheegey inaysan waxba ka jirin.

Dilal fara bdan oo ay geysteen xubno ka tirsan mooryaantii gobolka gacanta ku haaystey ayuu awood u yeelan waayey inuu tillaabo ka qaado, taasi oo lagu tilmaamey inuu laf ahaantiisa uu lug ku leeyahay mooryaan, amase uu naftiisa ku badbaadsanaayey.

Taasi oo ka dhigan weli inuu u afduubanyahay sida qaari horey u sheegeen, mooryaanta gobolka gacanta ku haaysa, hase yeeshee siyaasadda maanta isu beddeshey inuu codkooda ku hadlo oo ah dhaqaalihii ay ka heli jireen gobolka oo is dhiey awgeed.

Taasi oo ka dhalatey, mooryaantii oo kala jabey, oo Guddomiyaha , iyo taliyaha ciidanka booliska , aysan awood u leheen, mooryaantii , taasi oo mooryaanta dhaliilsanyihiin, guddi dhaqameedyadii uu guddoomiyaha soo abaabuley inay gobolka banaadir la raaciyo gobolka, ataa keentey inay ka gooystaan, taasi oo awooddii guddoomiyaha iyo taliyaha booliska ay wiiqdo xooggooda. Hase yeeshee guddoomiye C/qaadir waxuu noqdey qorigii laba dhinac ka gubtey, waayo ma awoodo inuu raalli geliyo dhinacyada ay u kala jabeen mooryaantii maamulkii hore, isla markaana ma awoodo inuu dadweynaha gobolka uu dhinac ka raaco.

Taasi oo horey au dhacdey in xubno ka tirsan dowladda una dhashey gobolka uu kasoo hor jeystey asaga oo garab siinaayey mooryaantii maamulkii asaga ka horreeyey.

Oogu dambeentii mudane Cabdulqaadir , waa nin u dhashey gobolka ayna saarantahay nabadgelyadiisa.

Xaayle Eemaan Suufow

Xaayle278@hotmail.com

Kismaayo: Aabaha caruur xalay lagu weeraray gurigooda xili hooyadood ay casho siineysay oo ka hadlay geerida caruurtiisa iyo dhaawaca hooyadood

Wararka ka imaanaya magaalada Kismaayo ee xarunta ayaa sheegaya in xalay weerar lagu qaaday guri uu dagan yahay nin ganacsade ah xili uu ninkaasi ka maqnaa guriga balse weerarkaasi uu sababay dhimashada Labo caruur ah oo uu dhalay iyo dhaawaca Xaaskiisa ee ilmahaasi hooyadood.

Aabaha dhalay caruurtan oo lagu magacaabo Cabaas Maxamed Xaaji ayaa sheegay in uu aad ugu xun yahay weerarka caruurtiisa lagu dilay isagoo intaa raaciyay inuusan garaneyn ujeedada rasmiga ah balse uu sheegay in danta ugu weyn ee weerarkaasi laga lahaa ay aheyd sidii isaga loo dili lahaa.

"Daqiiqado kadib ayaa Taleefan leygugu soo sheegay Salaadii cishaha kadib wixii gurigeyga ka dhacay" ayuu yiri Cabaas Maxamed Xaaji oo sheegay in xiligaasi uu ku maqnaa Salaada cishaha.

Si rasmi ah looma oga falkan bahalnimada ah ee lagu laayey qoys qura, iyadoo aabaha caruurta geeriyootay uu ka mid yahay ganacsatada biraha ka ganacsada isla markaana ka tirsan culumada degmada Kismaayo.

Magaalada Kismaayo ayaa xaaladeeda amaan ah mid aan cidna gacanta ku heyn iyadoo maliishiyo beeleed halkaasi ku badan ay dadka sidii ay doonaan ka yeela, mana jirto maamul la dhihi karo magaaladaasi waa ka jiraa.

Alshaabab ayaa ku eedeeyeen dadka reer Kismaayo arinkaas foosha xun, kal hore ayay ahayd markii ay gowraceen gabar yar oo aabaheed ka tirsan yahay Ciidanka Qalabka sida ee dowlada Federaalka, taaso aad looga naxey, "waa dhaqan xun oo lagu yaqaan Alshabaab,, ayuu yiri nin Reer Kismaayo ah.

Dagmada X/weyne ee magaalada Muqdisho waxey kamid tahay degmooyinka qadiimiga ah, uguna faca weyn degmooyinka gobolka Banaadir, waxaana taasi astaan u ah goobaha taariikhiga ah ee ku yaala degmadaasi sida Masaajidada oo qaarkood ay dhisan yihiin ilaa kun sanadood iyo wax ka badan, halka kuwa kalena aan la garaneynin xilliga la dhisay, waxaana ka mid ah masaajidadaasi masaajidka weyn ee Jaamacadda Xamar weyne Marwaas, Arbaca rukun, Fakhrudiin, Cadayga, iyo dhismayaal kale oo muddo fog la dhisay oo ku yaala xeebaha Xamar weyne sida dhismihii Siciid Barqash iyo Marsadii yareyd ee uu doonida ku xiran jiray oo ilaa hadda halkaasi lagu arki karo.

Degmada Xamar weyne oo soo martay marxalado kala duwan, ayaa ka hor dhicitaankii dowladii milateriga ahayd ee Maxamed Siyaad Barre ahaan jirtay suuqii ugu weynaa ganacsiga, uguna ciriiriga iyo mashquul-ka badnaa faras magaalihii magaalada Muqdisho, waxaana ay kaalintaasi ku weysay dagaaladii ahliga ahaa ee ka dhacay Muqdisho horaantii 90-meeyadii, wixii ka danbeeyey xiligaasna waxaa albaabada loo laabay suuq weynihii ganacsiga ee X/weyne oo isagu markii dambe loo raray suuqa weyn ee Bakaaraha ee magaalada Muqdisho, iyadoo taasina ay ugu wacan tahay kadib markii degmadaasi ay ka mid noqotay safafkii hore ee ay ka dhaceen dagaaladii ugu dhiiga badnaa ee dhexmaray taageerayaashii Marxuum Jen. Maxamed Faarax Ceydiid iyo Cali Mahdi Maxamed oo waagaas siyaasadda ku kala tegey, iskuna baacsanayey gacan ku hayntii magaalada Muqdisho.

Degmada Xamar weyne waxa ay garabka ku haysaa wixii loo yaqiinay Khadka-cagaaran ee kala qeybin jiray Waqooyiga iyo Koonfurta Muqdisho xilligii dagaal min-dhicireedka, waxaana uu ka maraa dhanka Qorax ka soo baxa wadada ka timaadda dhanka xeebta ee hormarta bankigii ganacsiga iyo keydka Soomaaliyeed iyo hotelkii hore ee Al-Curuba ilaa iyo taaladii Dal-jirka Dahsoon haatan oo muddo 15 sanadood ah laga joogo bilowgii dagaalada sokeeye waxoogaa xasilooni ahna la dareemay ayaa qaybihii ugu bilicda samaa degmada Xamar weyne iyo farasmagaalihii Muqdisho waxaa weli ka muuqda raadadkii iyo burburkii foosha xumaa ee ay ku reebeen dagaaladaasi, inkastoo aanay la mid ahayn degmooyinka la deriska ah sida degmada Shingaani oo iyadu guud ahaanba burburtay, laguna tilmaami karo xaafada keliya ee sida ugu ba’an ugu burburtay dagaaladii sokeeye.

Goobaha caanka ah ee dagaaladu ay galaafteen ee degmada Xamar weyne ku yaala ayaa waxaa ka mid ah Wasaaradii Maaliyadda, Bangigii dhexe ee Soomaaliya, Daartii Savoy Center oo ah dhismaha keliya ee ka badbaaday burburka, Shineemo Centrale, Misione, Xamar, Banaadir, Qalcada Kaniisadii Talyaaniga, Dahablihii X/weyne, Xaruntii hore ee Wakaaladda Xoogga Korontada ummadda, Maktabadii & Matxaf-kii Qaranka, Safaaradii Shiinaha, Masaajidkii Arbaca-rukun, Gurigii Talyaaniga (CASSA-ITALIA), Hoteelkii Shabeelle, Dhismihii Ex-baarlamaankii hore, Hotel-kii (CORREGE DEL SUD), iyo dhismayaal kale oo nawaaxigaasii ku yaalay oo ay lahaayeen hay’ado, ganacsato,iyo dad magac leh oo isugu jira Soomaali iyo Ajaanib.

Ruux damiir wadaninimo iyo Soomaalinimo ay ku jirto maanta ma sii daawan karo burburka goobahaasi. Muddadii aan lugta ku soo marayey burburka daarahaasi ayaa il ay murugo ka muuqato ku eegayey sida ay u yaalaan iyo waxyeelada argagaxa leh ee soo gaartay, wax dhaqdhaqaaq ah oo xaga nolosha ah kama jiraan, socodka dadkuna waa mid aad u yar oo teel-teel ah, gaadiidna haba sheegin marka aad dhexmareyso dhismayaasha burbursan ee halkaasi ku yaala waxaa uur-ku-taalo iyo naxdin kugu reebaya muuqaalka aan indhaha loo celin karin iyo tacadiga loo geystay dhismayaashii qaranka Soomaaliyeed iyo bilicsamidii magaalada Muqdisho.

Goobaha qaar marka aad agagaarkooda marayso sida nawaaxiga Shabeelle waa cidlo, waxaadna dareemeysaa cabsi aad u fara badan, adigoo is-weydiinaya goorta iyo halka lagaaga soo bixi doono, kamana welweleysid ammaan darro ah oo meeshii waa meel cidlo ah, waxa keliya ee dhagahaaga ku soo dhacaya waa codadka shimbiraha, iyo cayayaano kale oo kala gedisan oo iyagu u kala duulaya daaqadaha dhismayaasha burburay ee halkaasi ku yaala.

Waxay indhahaagu qabanayaan caws lixaad leh oo ka baxay burburka daaraha dhexdooda jiifa iyo hareeraha wadooyinka, dhismihii Ex-baarlamaankii hore ayaa guud ahaanba dhulka la siman, barxadii weyneyd ee ka soo horjeedayna oo xilligii beri-samaadkii marka la gaaro ciidaha xorriyada lagu soo bandhigi jiray ciyaaraha hidaha iyo dhaqanka ayaa hada waxaad ku arki kartaa xoolo u badan ari oo halkaasii loo daaqsiin keeno maalin walba,ka dib markii halkaasii ay si lixaad leh uga baxday dhir aad u fara badan.

Inta badan dad-ka Muqdisho marka aad wax ka weydiiso goobahaasi xilli ugu dambeysay, waxey kuu sheegayaan in iyagoo mudo 15 sanadood ah Muqdisho wax ka degan aanay hadana weli tegin oo aanay xittaa haweysan, iyagoo taasi sabab uga dhigay baqdin ay u baqayaan lafahooda, halka kuwo kalena ay kuu sheegayaan inaysanba kala garan karin hadda sidii ay kala ahaan jireen goobahaasi dhalan roga iyo is-bedelka burburka ku dhacay awgeed.

Dhinaca kale,marka laga yimaado qaybahaasii ay dagaaladu aafeeyeen waxaa jira meelo kale oo aad loo degan yahay oo ka tirsan degmada X/weyne oo ka badbaaday burburkii dhacay kuwaasoo muddooyinkan dambe ku talaabsanayey horumar dhinaca ganacsiga, amniga iyo arrimaha bulshadda, deegaanada ka badbaaday dagaalada oo ka tirsan degmada Xamar weyne ayaa waxaa ka mid ah :Xaafadaha Biasa, Jaamicada, Cadayga, Raqayga, Koodka, Nawaaxiga Via-Roma iyo Via-Egito, halkii hore loo oran jiray Cabdalla Shideeya, iyo Xaafadaha qadiimiga ah ee ku teedsan dacalka xeebta Xamar weyne, sida agagaarka Kawaankii hore ee Kalluunka iyo Xaafadda caanka ah ee loo yaqaano (AW-AWEESKA).

Inkastoo uusan jirin ganacsigii baahsanaa ee Xamar weyne ay caanka ku ahayd, uuna xiran yahay dhismihii cusbaa ee bacadlihii Xamar weyne oo isagu ka badbaaday dagaaladii sokeeye, ayaa haddana dhaqdhaqaaq ganacsi oo isa soo taraya waxaa uu ka jiraa agagaarka kawaankii hilibka iyo khudaarta ee Xamar weyne oo isagu sanadihii 80-meeyadii lagu dhisay deeq ay bixisay Midowga Yurub, iyo weliba qeybo ka tirsan wadada Via-Roma, waxaadna halkaasi ku arki kartaa dukaamo lagu iibiyo waxyaabo kala duwan sida dharka, cuntada, maacuunta iyo agabyada kale ee ay dadku u baahan yihiin iyo goobo kale oo ay ka mid yihiin meelo laga dirsado internet-yada, kuwaasoo habeen iyo maalinba furan waxaa halkaasi saldhigyo waaweyn iyo xafiisyaba ku leh shirkadaha Isgaarsiinta iyo kuwa xawaaladaha ee ka jira magaaladan Muqdisho, kuwaasoo dadka degan Xamar weyne u qabta adeegyo ay ka mid yihiin, teleefoon gelin iyo bixinta lacagaha xawaaladaha ah ee dadka xaafadahaasi u soo xawilaan eheladooda dibedda ku sugan.

Adeegyada kale ee daruuriga ah ee laga heli karo degmada Xamar weyne waxaa ka mid ah Biyo, iyo Koronto 24 saac ah oo ay bixiyaan shirkado ganacsi oo gaar loo leeyahay.

Degmada Xamar weyne waxyaabaha ganacsi ahaan ay weli caanka ku tahay waxaa ugu horeeya iyadoo degmadaasi ay ku taalo seylada ugu weyn ee loo iib keeno Kalluunka magaaladda Muqdisho, halkaasoo maalin kasta ay xadi Kalluun fara badan ah ay ka soo

Dhinaca kale, xaga amaanka degmada Xamar weyne waxa ay ka mid tahay goobaha ugu xasiloonida badan oo ay ku yar yihiin isku dhacyada maleeshiyooyinka hubeysan marka loo eego qeybaha kale ee magaalada Muqdisho, waxaana dhinaca suggida nabadgelyadda degmadaasi ka hawlgala ciidamo Madani ah oo ka tirsan maleeshiyooyinkii ka qeyb qaatay dagaaladii sokeeye kuwaasoo haatan la qabsaday dadka deegaanka, iyagoo lacago yar-yarna ka urursada goobaha ganacsiga iyo suuqyda nawaaxigaas ku yaala.

Xaga caafimaadka dadka degmada Xamar weyne ku dhaqan ma haystaan adeega caafimaad, marka laga reebo qeybo ka mid ah isbitaalka ugu faca weyn Sooomaaliya oo ah Isbitaal Mertiini ayaa waxey xarun u tahay qaar ka tirsan ciidankii xoogga dalka Soomaaliyeed ee ku naafoobay dagaaladii dhexmaray Soomaaliya iyo Itoobiya, howsha keliya ee uu hadda qabtana isbitaalkaasi Mertiini waxey tahay tababaro gaagaaban oo halkaasi ay ku siiso arday Soomaaliyeed oo mutadawiciin ah hay’adda bisha cas ee Soomaaliyeed, waxaana dhinaca caafimaadka degmada ka saacida hal M.C.H oo isagu daryeel caafimaad oo kooban u fidiya hooyadda iyo dhalaanka deegaankaasi.Dhinaca waxbarashadda degmada Xamar weyne inkastoo aad loogaga dheereeyo marka loo eego qeybo ka tirsan Muqdisho haddana waxaa subax walba u kalaha dugsiyada H/dhexe ee Xamar weyne, iyo Xaawo Taako arday fara badan oo ka kala yimaada degmada Xamar weyne iyo degmooyinka la deriska ah maadaama aysan jirin dowladdii dhexe ee taakuleyn jirtay macalimiinta, waxaana ardayda dhigata dugsiyadaasi bil kasta laga qaadaa lacago Fee ah oo ay bixiyaan waalidiinta ardayda wax ka barata dugsiyadaasi si macalimiinta ay mushahar ahaan uga dhigtaan.

Degmada Xamar weyne waxaa weli ku nool qaar ka ka tirsan fanaaniintii iyo abwaanadii hore ee Soomaaliyeed ee ka soo jeeda beelaha Banaadiriga ah, kuwaasi oo ku caan baxay sameynta iyo jiliinka riwaayadihii laga daba dhacay ee masraxyada dalka lagu soo ban dhigay xilligii beri-samaadkii waxaana ka mid ah Abwaan Macow Aw-Diinle, Cali Cusmaan Daroog, Xaaji Iikar Leeb, Sheekh Mayow Halaag, Jilaagii caanka ahaa Maxamed Cusmaan (Ina), Faarax Siidow Faarax, Maxamed Aweys Geedow, sidoo kale Jilaagii caanka ahaa Makki Xaaji Banaadir iyo kuwo kale.Goobihii waaweynaa ee dadku ay ku madaadalan jireen, sida shineemooyinkii waaweynaa ee ay lahaan jirtay degmada Xamar weyne ayaa guud ahaanba ku baaba’ay dagaaladii sokeeye waxaana qaarkood ay noqdeen goobo qashin qub ah, marka laga reebo shineemo Super oo hadda ah aan u shaqaynin sidii loogu tala galay, taa bedelkeedana waxaa xaafadaha dhexdooda laga furay shineemooyin yar yar oo habeen iyo maalinba shaqeeya, kuwaasoo tayadooduna ay aad u hooseyso marka laga eego goobaha iyo qalabka ay isticmaalayaan.Degmada Xamar weyne waxaa deegaan ahaan u badan dadka loo yaqaano Qowmiyada Banaadiriga ama (GIBIL-CADKA) dadkaasi noloshoodu 70% waxey ku tiirsan yihiin lacago ay u soo diraan eheladooda dibedaha ku maqan, iyada oo sida laga warqabana kumanaan dadka Banaadiriga ah oo ka qaxay dalka xilligii dagaaladii sokeeye ay degenaansho qaxootinimo ka heleen Maraykanka iyo qaar ka tirsan dalalka Yurub.

Dadka Banaadiriga ah waa dad nabadeed oo aan ka tirsaneyn beelaha hubeysan, taasina waxey keentay in dadkaasi ay u nuglaadaan burcadda, bartilmaameedna u noqdaan kooxaha wax afduubta, waa dad inta badan ka gaabsada siyaasadda, xirfadahooda shaqo waxaa ugu weyn ganacsiga oo aad ka dareemeyso marka aad ku dhex socoto xaafadaha ay degan yihiin, inkastoo ammaan darrada jirta awgeed aanay hadda ganacsi waaweyn faraha kula jirin, xirfadaha kale ee aadka ugu badan dadka Bnaadiriga ah ayaa waxaa ka mid ah Jilaabashada Kalluunka iyo Toliinka dharka oo qoysas badan oo reer Xamar weyne ah ay ku tiirsan yihiin.Ugu danbeyntii dadka reer Xamar weyne waxa ay quudareynayaan in ay mar uun arkaan dowlad Soomaaliyeed oo shaqayneysa, dibna u soo celisa sharcigii, xasiloonidii iyo kala dambeyntii dadku ay ku wada noolaan jireen.

Waxaa Qoray:

Nasrudiin Caydiid Salaad(DIINI)E-mail:

diinicadde@hotmail.com

Cabashada qaxootiga iyo cadawtooyada argagaxisada.

Maqaalkan aan ugu magac darnay cabashada qaxootiga iyo cadawtooyada argagaxisada waxaan diirada ku saari doonaa dhibaatada haysatada dadka qaxootiga ah ee ka barakacay dalka gaar ahaan magaalada muqdisho ka gadaal markii ay korortay dhibaatada argagaxisada ay ku hayaan dadka rayidka ah, waxaana ay hada dadkan ku noolyihiin xeryo cooshado ka samaysan oo ku yaala duleedka muqdisho iyagoo halkaas ay ku haysato macluul iyo dhibaato fara badan.

Hadaba marka aad booqato xeryaha qaxootiga ee ku yaala deegaanka ceelasha biyaha oo ah halka ugu badan ee ay dagan yihiin dadkan ayaa waxaad ku arkaysaa muqaalo aad u argagax leh oo dadkan ka haysta dhanka nolosha.

Booqasho aan dhawaan ku tagnay xeryaha ku yaala duleedka muqdisho iyo kuwa kale ee gudaha magaalada ku yaala ayaa waxa aan kula kulanay tiro dad ah oo ka mid ah qaxootiga goobahaasi ku sugan kuwaas oo ay ka muuqatay dhibaato nololeed oo aad uliidatay. Qaar ka mid ah dadkan ayaan wax ka waydiinay dhibaatada haysata dhinaca ay ubadan tahay iyo waxa ay hada ka cabanaayan.

"Hada xaalada nololeed ee xerooyinkan waa kuwo aad usii xumaanaya , waxana noogu daran dhanka cunada , mana helno kaalmooyin cuno ah oo inagu filan"

sidaana waxa yiri oday da,ah oo ka mid ah qaxootiga ku dhaqan mid ka mid ah xeryaha ku yaala magaalada muqdisho.

"Waxaan si wayn ucodsanaynaa in kaalmooyin dag dag ah ay inala soo gaaraan hay,adaha iyo ururada caalamiga ah iyo kuwa kale ee somalidaba"

ayuu hadalkiisa sii daba dhigay .

"Waxaan daganaa xaafada baar-ubax ee magaalada muqdisho,waxaan halkaas uga soo qaxay ka dib markii aan la kulanay dhibaato xoogan oo ubadan hanjabaad iyo iyadoo hoobiyayaal xaafa dhexdeeda si aan loo meel dayin ay kooxahaas hubaysan uga tuurayaan"

Sdaana waxaa tiri hooya somaliyeed oo aan kula kulanay xera qaxooti oo ku taala deeganka ceelasha ee ku yaala duleedka koofureed ee muqdisho.

"Waxan haystaa laba caruur ah oo aad u yar yar mana heli karo wax aan ku quudiyo "

ayeey marka kale tiri haweneydan oo marka aanu la kulmaynay dusha ku siday canug aad uda, yar oo ay iyada dhashay. Si kastaba ha ahaate xaalada haysata dadka barakacayaasha ah ee ku dhaqan duleed yada muqdisho iyo gudaha magaalada ayaa ah mid aan la soo koobi karin, waxaase ugu badan wax yaabaha ay dadkan dalbanayaan kaalmooyin caalami ah oo dhanka cunada iyo caafimaadka ah.

Barakaca dadkan oo ka badan ilaa iyo hal malyan oo ruux sida lagu sheegay warbixin ka soo baxday hay,ada UNHCR ayaa waxa ay timid ka gadaal markii ay soo kordheen falalka dhibaataynta ah oo ay kooxaha argagaxisadu la beegsanayaan dadka rayidka ah ,waxaana ka mid ah falalkaasi iyagoo qaraxyo iyo weeraro ka fuliya goobaha ay dadka rayidka ku suganyihiin taas oo dadka ku kaliftay in ay isaga baxaan magaalada iyagoo ka fogaanayaa dhibaato ka soo food saari karta falalkaasi.

Hase ahaate waxaa la gudboon hay,adaha sama-falka caalamiga ah iyo kuwa somalida ahba in ay fiiro gaar ah uyeeshaan dadkan isla markaana kordhiyaan kaalmooyinka ay gaarsiiyaan xeryaha ay qaxootigu ku jiraan, si ay fursad ugu helaan qaxootigan in ay noloshooda dabaraan maadama ay

Tafatiraha Wargeyska

Banaadir Post.

Xamar Cade.

Hey’ada Qaramada Midoobay ugu qaabilsan xaga qoxootiga aduunka ee marka lasoo gaabsho loogu yeero (UNHCR)ayaa mar kale ku celisay dalab ay u jeediney

Hey’ada Qaramada Midoobay ugu qaabilsan xaga qoxootiga aduunka ee marka lasoo gaabsho loogu yeero (UNHCR)ayaa mar kale ku celisay dalab ay u jeedineyso afduubayaasha Soomaaliyeed,kaas oo ah in si shuruud la’aan ah lagu sii daayo madaxa UNHCR ee magaalada Muqdisho Hassan Mohammed Ali, oo todobaadkan lagu qafaashy degaanka Ceelasha biyaha ee u dhexeya Muqdisho iyo Afgooye.

Baaqa kasoo baxay hey’ada qoxootiga Qaramada Midoobay waxaa uu kusoo beegmayaa iyadoo deegaankii masuulkan lagu afduubtay ay ka dheceen dibad baxyo wali u muuqda in ay sii soconayaan oo dadweynaha Soomaaliyeed ay ku dalbanayan in lasii daayo masuulka UNHCR ee magaalada Muqdisho.

“Shacabka Soomaalidu aad ayay uga walaacsanyihiin dhibaatada loo geystay masuulkan u hayay shaqada muhiimka ah”sidaasi waxaa yiri agaasimaha UNHCR ee dalka Soomaaliya Guillermo Bettocchi.

Waqti xaadirkan waxaa dalka Soomaaliya afduub ahaan loogu heystaa 9 ka mida shaqaalaha gargaarka bini’aadanimada oo intooda badana ay ku afduuban yihiin gobalka Shabeelaha hoose.

Madaxa UNHCR ee magaalada Muqdisho waxaa sabtidii laga kexeystay hoygiisa,ka gadaal markii ay soo weerareen rag hubeysan oo ilaa iyo iminka aan heybtooda la garan,waxaase la sheegayaa in lagu heysto meel aan ka fogeyn halkii markii hore laga qafaashay oo ah Ceelasha biyaha.

Dad ayaa leh ama sida ay ogyihiin waxaa arinta gaysta raga Gobolka SH Hoose u qaabishan xaga amniga, waa ku kuwa Booliska,waxaas oo gar wadeen u yahay ninka sheegta taliyaha Ciidanka Gobolka shabeelada Hoose Nuur Cali Faarax, oo ah nin ay Ilmo adeer Yihiin,ninka aad loo Yaqaan JAALE INDHACADE.

Waxaa kaloo gacantooda ku jira dad u badan shaqaale hay,daha gargaarka ama kuwa dadka quudiya.

Waxa maalmahan danbe aad loo hadal hayay 3 qof oo shaqeeya hay,ad talaayni ah oo dhinaca beeraha ka shaqeysa oo gacantooda ku jira, waxaa arintaas og dadka beeralayda ah oo degen degaanka laga qabsadey dadkan.

Waxaa indhaha is tiriya dhamaan kuwa wax ka qaban kara arintan, sida Dowlada Federaalka iyo ciidanaka Itoopiyaanka . Golaha wasiirada, barlamaamnka oo dhamaan ka aamusey.

Yaasiin Yare.
Xamar Cade.

Walalayaal waxaad wada arkeysaan in nin aanba ka tirsaneyn Muqaawamada ama maxkamadaha oo hadana har iyo habeyn afka ku haya nabadii Jabuuti lagu soo

Ana waxaan taagnahay nabada waan u bukaa ee ii daa, isna wuxuu leeyahay kuu deynmaayee waan burburinayaa, ana dhibanaan ahay kan dhulkiisa lagu dagalamayaan ahay intaa kabadana ma yeeli karo dagaalkii waa isoo karey oo Kax baan ahay, isaguna wuxuu leeyahay inta midka u danbeeya meydkiisa Isbitaalka madiina looga qaadayo walee dagaalka waan kugu wadayaa, mana joogo meesha uu dagaalku ku socdo oo madfaca meel uusan gaari karin buu joogaa

.Kuwa sheeganaya in ay cadowga la dagaalamayaan ka ma mid aha oo waan ogahay, nin Takbiirta afkiisa aanu ka maqlneyna maaha, Xaas iyo Caruur kaga dhiman mayaan oo Uk bey u joogaan, Gobolkii uu ka soo jeedey maaha meesha lagu baabaayo, Bakaaraha har iyo habeyn Madfaca ku dhacayo kanixi maayo, barakaca iyo ba'ayda ka agyeeri meyso Cimaamad maxirna oo Jaakadiisuu ku taagan yahay, oo qayilaad qaab xumuu Asmara la fadhiyaa.

Intaa midna kuma jiro, marka sow gardaro maaha waxa uu u hadlayo markii uu maqley nabada soow marag madoonta maaha, inuu yahay nin ku hadlaya afka meesha uu magangelyada u joogo, waxa uu wado mid aan ka qaadan karo maaha, waxa uu igu maagayana ma garan, dagaalka aad durbaanka u tumeysidna macnihiisa waa mid aan cadayn balse maanta maalin aan ahayn baa lagaala xisaabtami doonaa mid la iskaga harayana ma noqon doono, ee taas meel ku duubo kuna talagal in cadowga dadkii keenay aad tahay waana baxayaan mudada loo qabtey insha allah.

Horaa loo yiri Jini Ninkii Keenaa Bixiya marka cidii keentey wey bixin dalku waa degi rajadyada, bakaarana waa la dhisi intii hore ugu dhimateyna allaha naga samir siiyo inta harteyna sharta aad la rabtaa allaha ka bad baadiyo oo adiga Allaha kugu celsho aamiin aamiin.

Sheekh Shariif lacag buu UNta ka soo qaadayaa oo muqaawamada ayuu ku fur furayaa taas waa mid muqawamada utaala iney kaaga jawaabaan waayo ayagaad meel uga dhacdey saa waxaad ku sheegtey rag qadiyadooda ay lacag kala weyn tahaye, Sheekh Shariifna waxaad ku timaantey nin wuxuu u soo halgamayey dhuuni siisanaya taana anagaa ka xaal marneyna Xashaa ku lilaah waana ka sharaf weyn yahay waxaas, nin waxaas ku kacana maaha, kaana qiima badan umadoo dhan baa iiga markhaatiya nin walba intiisaa la siiyaa waa ceeb ka saliin la isu wada sheegay, waa Sheekh IBnu Sheekh Ibnu Sheekh Sheekh waa asal ahaan nin diinta lagu soo abaabiyey waa nin taariikh diisa lagaranayo waa nin qool leh ee maaha hayi raac.

Zam ZAM Laaska

zamzam900@yahoo.com

Faarax Sindiko “anigaa ah Gudoomiyaha XKCS, waxaana taageeraa Muqaawada, dalkana ma imaan doono inta ay ku sugan yihiin Ciidamada Itoobiyaanka…”

Faarax Wehliye Cadow Sindiko oo wareysi gaar ah ay la yeelatay Idaacadd Somaliweyn ayaa sheegay inuu arrimo caafimaad u joogo dalka Mareykanka, loona soo jeediyay inuu hogaanka Xiriirka Soomaaliyeed ee Kubadda Cagta uu noqdo.

Mr. Sindiko waxa uu sheegay in lagu soo weegeliyay in loo doortay inuu noqdo Gudoomiyaha Xiirka Kubadda Cagta, wuxuuna sheegay in hadii ay kooxaha intooda badan isku raaceen inay I doorteen uu aqbalay doorashadaasi.

“Xiirika kubadda Cagta waqtigiisa waa dhamaaday, wuxuuna ku ekaa 12-kii maarso ee aan soo dhaafanay” ayuu yiri faarax Sindiko oo dhinaca kalana sheegay in Ururka Kubadda cagta ee FIFA uusan ogalaanayn wax aan sharci ahayn.

Sidoo kale Faarax Sindiko waxa uu sheegay inuusan isagu u hanqaltaagayn wax xil ah, wuxuuna shaaca ka qaaday inuu ka mid yahay gudiga Fulinta ururka Kubadda Cagta ee Afrika, islamarkaana luusan u baahnayn wax aan ku imaan Doorasho xor ah.

“Muqaawamada ayaan taageeraa Xoog iyo Dhaqaalaba, waana ogyihiin, anigu waxaan ka mid ahay raga ay Itoobiyaanku doon doonayaan” ayuu yiri Faarax Sindiko oo sheegay inuusan dalka imaanayn inta ay amxaaro joogto.

Faarax Sindiko waxa uu mar kale yiri “ Ciidamada Itoobiyaanka inta ay joogaan lagama yaabo inaan imaado dalka, waxaana dalka imaanaa hadii dalka xoog looga saaro ama xeelad”

.Mar la weydiiyay sida uu dalka dibadiisa uga shaqeyn karo isagoo aan dalka imaan ayuu yiri “waxaan la mid ahay Isbahaysiga Dib u xoraynta oo isaguba ka howlgalaya iminka dalka dibadiisa oo ay howshiisa socoto, anigaa aqaan sida loo shaqeeyo “.

Banaadir Post

Xamar Cade.

Dilalka oo kusoo badanaayo magaalda Marka

Magaalada Marka ee magaalada madaxda G/sh/hoose , xaley waxaa ka dhacey dil, loo adeegsadey dariiqad cusub oo aan horey loo aqoonin, kaasi oo loo adeegsadey qalab aan caadi ahayn.

Waxaa halkaasi lagu diley nin sida ay wararka sheegayaan inuu can ahaan, siiba waayahaan danbe noqdey nin maalyahan ah, kaasi oo la leeyahay waxuu ka maaleystey Canbar uu ka heley xeebta magaaladaasi.

Marxuumka halkaasi lagu diley ayaa la dhihi jirey sida la sheegey Nuur Maadey, waxaana la diley asaga oo kasoo baxey masaajid ku yaalla xaafadda Buula Jaan, ee magaalada Marka, ka dib markii uu soo dukadey salaadda Cishaha.

Marxuumkaasi marka uu kasoo baxey masaajidka , nin aan la garaneynin uu la beegsadey fallaar, uuna kala heley ku aadanka wadnaha, halkaasina uu ku ahaa goob la yaal.

Dilaaga ayaa baxsadey isla markiiba oo aan la garan qof uu ahaa,iyo halka uu u baxsadey, waxaase la ogeen sababta keentey dilkaasi, hase yeeshee dadweynaha magaalada Marka ayaa la yaabey habka loo adeegsadey dilka.

Inkatoo arrintaani ay ku cusubtahay, hase yeeshee waxaa la ogsoonyahay in dadka deegaanka ay weligood hubka ay ku caan ahaayeen uu yahay Qaansada iyo Fillaarta, hase yeeshee dadka aan degaanka u dhalan umbaa taasi ka war haaynin.

Waxaana hubaal ah , in hubkaani loo adeegsadey dilka ninkaani uu noqon doono mid dhibaatadiisa ay weynaato, waayo waa hub aan la celin Karin oo u hor seedi karto in dad badan oo ciil qabey ay u wareegaan is ticmaalka hubkaani.

Taasi oo noqondoonta inay dad badan oo deegaanka aan u dhalan oo laga diiddanaa inay , danta ku qasabto inay iskaga baxaan, taasina ay noqoto mid u horseedda in dadka dhibaatada ku haayey gobolka loo adeegsado hubkaani aan codka laheyn.

Wargeyska Banaadir Post.

Tafatiraha Wargeyska.

Gabdho Soomaaliyeed oo Ciraaq ku Go'doonsan si qasab ahne Shaqaale Looga dhigtay.

Rag Xafiisyo ka samystey Magaalada Moqdisho ayaa sheegay iney gabdhaha Soomaaliyeed shaqo uga hayaan Isbitaalo ku yaala Siiriya, kuwaas aan la geyn Siiriya ee la geeyay Ciraaq si lama filaan ah.

Gabdhahaan ayaa midiiba laga qaaday lacag garayso Kun Dollar sida ay ku warameen,waxaana lacagtaas ka qaaday xafiis ay shirkadaan been abuurka ah ay ku leedahay Magaalada Muqdisho gaar ahaan KM4.waxeyna leedyahay rag kale oo u jooga meelo kale oo kala duwan, sida Ciraaq, Siiriya, Cumaan, Dubai.

Mid kamid ah Gabdhaha ku Go'doosan dalka Ciraaq oo lagu magacaabo Wiilo Macallin Cabdulle ayaa Warbaahinta u sheegtay inay hadda ku sugantahay Magaalada Sulaymaaniya ee Caasimmada u ah Gobolka ku yaala Waqooyiga dalka Ciraaq ee

Kurdustaan.

Gabadhaan ayaa lagu qasbay in ay u shaqayaan Qoysas Ciraaqiiin ah si Lacag la'aan ahsida ay sheegtay Wiilo Macalin ,iyagoo Qoysaskaan Shirkadii Gabdhahan soo sirtay ka dibna ku sii iibisey lacag gaaraysa laba kun oo dollar lacagtaas ma qadanayaan gabdhuhu ee waxaa qadaanaya shirkadii been abuurka aheyd, Gabdhahan waxay ku shaqaynayan qaab lacagla'aan ah.

Tiradda Gabdhahaan ayaa markii hore ahaa 12 Qofood ayaa hadda sadax ka mid ah Soomaliya dib loogu celshay kadib markii ay sida Wiilo ku warantay ay Calooshoodu Dilaacday Culeyska biyo dhaaminta biyahaas la saaro Dabaqyo dhaadheer.

Ayaan darada heysata Gabdhaha Soomaliyeed ayay tani ka mid tahay, waana masiibo Soomali oo dhan haysa, kuna haysa meel kasta oo joogaan soomali..

Digniin Somaliyeey ka fiirso meeshaad ku socoto,

Banaadir Post.